Նեպալում տեղի ունեցած ավիավթարի հետևանքով զոհվել է ավելի քան 38 մարդ

Այսօր՝ մարտի 12-ին, Նեպալի մայրաքաղաք Կատմանդուի միջազգային օդանավակայանի մերձակայքում կործանվել է US-Bangla Airlines ավիաընկերությանը պատկանող Bombardier Dash Q-400 միջին մայրուղային օդանավը։ Այս մասին, ինչպես հայտնում է ՏԱՍՍ-ը, տեղեկացրել է Սինհուա գործակալությունը՝ հղում կատարելով տեղի իշխանություններին։

«Հրշեջներն արդեն անցել են գործի, մենք պարզում ենք ավիավթարի պատճառները», - ասել է ավիացիոն գերատեսչության ներկայացուցիչներից մեկը։

Նշվում է, որ ինքնաթիռը վթարի է ենթարկվել վայրէջքի ժամանակ։ Ինքնաթիռը կորցրել է կառավարումը ապա, հայտնվելով օդանավակայանին հարակից ֆուտբոլի դաշտում, այրվել է։

Վերջին տվյալների համաձայն՝ ավիավթարի զոհ է դարձել ավելի քան 38 մարդ, վիրավորվել՝ 23-ը։ Reuters գործակալության փոխանցմամբ՝ օդանավում եղել է 67 ուղևոր։

Նշվում է, որ ինքնաթիռն իրականացնում էր Դաքքա-Կատմանդու թռիչքը։

Օդանավակայանի աշխատակազմը ենթադրում է, որ վթարը տեղի է ունեցել տեխնիկական անսարքության պատճառով։