Ղրիմում Անկարային հիշեցրել են ռուս-թուրքական պայմանագիրը
Ղրիմի կառավարության ղեկավարի տեղակալ, ՌԴ նախագահի մոտ Ղրիմի մշտական ներկայացուցիչ Գեորգի Մուրադովը Թուրքիային հիշեցրել է հետպատերազմյան պայմանագրերը, որոնցում ընդունվում էր Ռուսաստանի ինքնիշխանությունը Ղրիմի նկատմամբ։ Այս մասին գրում է Ռիա Նովոստի-ն։
Մուրադովն այսպես է մեկնաբանել Թուրքիայի արտաքին գործերի նախարարության հայտարարությունն այն մասին, որ 2014 թ․ մարտին Ղրիմում տեղի ունեցած հանրաքվեն հակաօրինական է, իսկ թերակղզու՝ Ռուսաստանի Դաշնությանը միանալը՝ բռնակցում։ Բացի այդ Թուրքիայի ԱԳՆ-ում հայտարարել են, որ Ղրիմի ներկայիս կարգավիճակը հակասում է միջազգային իրավունքի նորմերին, և աջակցություն հայտնել Ուկրաինային տարածքային ամբողջականության և ինքնիշխանության հարցերում։
«Ցավալի է, որ Թուրքիայի արտաքին քաղաքական գերատեսչությունը մոռանում է այն, ինչը պետք է հիշել ընդմիշտ՝ պատերազմից հետո կնքված ռուս-թուրքական պայմանագիրը։ Հիշեցնեմ, որ համաձայն դրա՝ Թուրքիան վերջնականապես ընդունել էր Ռուսաստանի ինքնիշխանությունը Ղրիմի նկատմամբ։ Ընդգծեմ՝ միայն Ռուսաստանի ինքնիշխանությունը», - ասել է Մուրադովը։
Նրա խոսքով՝ երկու երկրների միջև Ղրիմի հարցով այլ փաստաթղթեր չեն ընդունվել։
«Պատմությունը ցույց է տալիս, որ չափազանց վտանգավոր է մոռանալ, կամ առավել ևս մերժել այն համաձայնագրերը, որոնք կնքվել են արյունահեղության արդյունքում», - ընդգծել է պաշտոնյան։
15-րդ դարի վերջին Ղրիմի լեռնային մասերը և ծովափնյա քաղաքները մտնում էին Օսմանյան Կայսրության կազմի մեջ, իսկ թերակղզու մնացած շրջանները ղեկավարում էր կայսրության վասալը՝ Ղրիմի խանությունը։
1768-1774 թ․թ․ ռուս-թուրքական պատերազմից հետո՝ 1774 թ․ Քյուչուք-Քայնարջա գյուղում կնքված պայմանագրով թուրքերը հրաժարվել են Ղրիմի նկատմամբ հավակնություններից։ 1783 թ․ Ղրիմը դարձել է Ռուսական Կայսրության մաս։
Խորհրդային Միության փլուզումից հետո թերակղզին մտավ Ուկրաինայի կազմ, իսկ 2014 թ․ անցկացված հանրաքվեի արդյունքում կրկին միավորվեց Ռուսաստանին։