Քաբուլում տեղի ունեցած պայթյունի հետևանքով զոհվել է ավելի քան 26 մարդ

Աֆղանստանի մայրաքաղաք Քաբուլում տեղի ունեցած պայթյունի հետևանքով զոհվել է ավելի քան 26 մարդ, վիրավորվել՝ 18-ը։ Այս մասին, ինչպես հայտնում է ՏԱՍՍ-ը՝ հղում կատարելով Ռոյթերս-ին, հաղորդել է Աֆղանստանի ներքին գործերի նախարարությունը։

Աղբյուրի փոխանցմանբ՝ ահաբեկիչը պայթեցրել է իրեն Քաբուլի արևմտյան հատվածում գտնվող շիաների հավաքատեղիի մոտակայքում, որտեղ բնակիչները հավաքվել էին նշելու Նովրուզը ( աստղագիտության արևային օրացույցով  իրանական և թուրք ժողովուրդների Նոր տարի, - խմբ․):

Ինչպես հայտնում է Tolo News հեռուստաալիքը, Աֆղանստանի ներքին գործերի նախարարությունը հաստատել է, որ մահապարտ ահաբեկիչը պայթուցիկ սարքը գործարկել  է Ալի Աբադի հիվանդանոցի և Քաբուլի համալսարանի մոտ:

Reuters-ի հաղորդմամբ պայթյունի պատասխանատվությունը ստանձնել է «Իսլամական պետություն» ահաբեկչական խմբավորումը։