Ֆրանսիայի ԱԳ նախարարը հաստատել է, որ նախագահ Մակրոնն առաջիկա մայիսին կայցելի Մոսկվա
Շարունակվում են Ֆրանսիայի նախագահ Էմանուել Մակրոնի՝ առաջիկա մայիսին Մոսկվա այցելության նախապատրաստական աշխատանքները։ Այս մասին, ինչպես գրում է ՏԱՍՍ-ը, հայտարարել է Ֆրանսիայի արտաքին գործերի նախարար Ժան-Իվ Լե Դրիանը։
«Ինչպես հաղորդել ենք ավելի վաղ, այդ այցը նախատեսված է։ Տվյալ պահին իրավիճակն այսպիսին է», - ասել է Լե Դրիանը։
Պատասխանելով Սերգեյ Սկրիպալի թունավորման մասին հարցին՝ Ֆրանսիայի ԱԳ նախարարը նշել է, որ «միայն Ռուսաստանը կարող է արտադրել «Новичок» անունով թունավոր գազ»։
«Չի կարող լինել ավելի համոզիչ բացատրություն քան այն, որ Ռուսաստանն առնչություն ունի տեղի ունեցածին։ Եվ հենց այսպիսի հայտարարությամբ է Ֆրանսիան հանդես գալիս, սակայն Մոսկվան չի արձագանքում սրան։ Հենց այս փաստը հաշվի առնելով էլ՝ նախորդ շաբաթ կայացած ԵՄ գագաթնաժողովի ժամանակ ձեռնարկվեցին հակաքայլեր, և նախագահ Մակրոնը որոշեց արտաքսել ռուս դիվանագետներին», - նշել է Լե Դրիանը։
«Մենք, ամեն դեպքում, ցանկանում ենք երկխոսություն ունենալ Մոսկվայի հետ՝ կոչ անելով նրան պահպանել միջազգային իրավուքի նորմերը», - ավարտել է Ֆրանսիայի արտաքին քաղաքական գերատեսչության ղեկավարը։
Հիշեցնենք, որ ավելի վաղ ԵՄ անդամ մի շարք պետություններ, ինչպես նաև ԱՄՆ-ը, Կանադան, Նորվեգիան, Ուկրաինան և այլն, հայտարարել էին, որ արտաքսում են ռուս դիվանագետների՝ կապված այս տարվա մարտի 4-ին բրիտանական Սոլբսերի քաղաքում ՌԴ հետախուզության նախկին գնդապետ Սերգեյ Սկրիպալի և նրա դստեր թունավորման դեպքի հետ, որում Մեծ Բրիտանիան մեղադրում է Ռուսաստանին։