ՌԴ-ից ամերիկացի դիվանագետների արտաքսումը նշանակում է Մոսկվայի և Վաշինգտոնի միջև հարաբերությունների հետագա վատթարացում․ Սպիտակ տուն

Վաշինգտոնը կարծում է, որ Ռուսաստանի կողմից ամերիկացի դիվանագետների արտաքսումը նշանակում է ԱՄՆ-ի և ՌԴ-ի միջև հարաբերությունների հետագա վատթարացում։ Այս մասին ասվում է Ապիտակ տան մամուլի ծառայության տարածած հաղորդագրության մեջ․ գրում է ՏԱՍՍ-ը։

«Ամերիկացի դիվանագետներին արտաքսելու մասին Մոսկվայի որոշումը ենթադրում է Վաշինգտոնի և Մոսկվայի միջև հարաբերությունների հետագա վատթարացում։ ԱՄՆ-ի, ավելի քան երկու տասնյակ գործընկեր երկրների և ՆԱՏՕ-ի դաշնակիցների՝ ռուս հետախույզներին արտաքսելու մասին որոշումը ողջամիտ պատասխան էր բրիտանական հողում ռուսական հարձակմանը», - ասվում է տարածված հաղորդագրության մեջ։

Նշվում է նաև, որ ամերիկացի մի խումբ դիվանագետների արտաքսելու մասին Մոսկվայի որոշումն անակնկալ չէր Վաշինգտոնի համար, և ԱՄՆ-ը պատրաստ է պատասխանել ՌԴ-ի այս քայլին նույնպես։ «Ռուսաստանի պատասխան այս քայլն անսպասելի չէր․ ԱՄՆ-ը կզբաղվի սրանով», - ասվում է փաստաթղթում։

Հիշեցնենք, որ մարտի 26-ին Վաշինգտոնը հայտարարել էր ռուս 60 դիվանագետների արտաքսելու և Սիեթլում ՌԴ գլխավոր հյուպատոսարանը փակելու մասին։ Ավելի ուշ Եվրոպական 24 երկիր, ինչպես նաև Կանադան, Ավստրալիան և Վրաստանը հայտարարեցին ռուս 63 դիվանագետի արտաքսելու մասին։ ՆԱՏՕ-ն նվազեցրեց ռուսական առաքելության անձնակազմի թիվը՝ հասցնելով 20-ի, իսկ ԵՄ-ը խորհրդակցության նպատակով հետ կանչեց ՌԴ-ում իր դեսպանին։ Այս օրինակին հետևեցին Բուլղարիան, Լյուքսեմբուրգը, Մալթան, Պորտուգալիան և Սլովակիան։

Ավելի վաղ Մեծ Բրիտանիան արտաքսել էր ռուս 23 դիվանագետի, ինչին Մոսկվան հայելային պատասխան էր տվել։