Սանկտ Պետերբուրգում ԱՄՆ գլխավոր հյուպատոսարանի շենքի վրա կրկին բարձրացվել է ամերիկյան դրոշը
Սանկտ Պետերբուրգում ԱՄՆ գլխավոր հյուպատոսարանի շենքի վրա կրկին բարձրացվել է ամերիկյան դրոշը, որն իջեցվել էր Կեմերովոյում տեղի ունեցած հրդեհի կապակցությամբ հայտարարված սքի պատճառով։ Այս մասին հայտնում է Ria Novosti-ն։
Նշվում է, որ այսօր՝ մարտի 31-ին՝ առավոտյան 9:30-ի սահմաններում, նշված շենքի երրորդ հարկի պատշգամբում հայտնվել է մի տղամարդ և կրկին բարձրացրել ԱՄՆ պետական դրոշը։
Աղբյուրի փոխանցմամբ՝ շենքի մոտ կայանել է նաև մի բեռնատար, սակայն մեքենայում դեռ ոչինչ չեն բեռնում։ Գլխավոր հյուպատոսարանի շենքի մոտ, առաջվա նման, հերթապահում է ոստիկանությունը։
Մարտի 29-ին ՌԴ արտաքին գործերի նախարարությունը հայտարարել էր, որ փակում Սանկտ Պետերբուրգում ԱՄՆ գլխավոր հյուպատոսարանը։ Ամերիկացիները հյուպատոսարանի շենքը պետք է լքեն ոչ ուշ քան մինչև մարտի 31-ը։
Այս որոշումը հայելային պատասխան էր ամերիկացիների կողմից ռուս 60 դիվանագետի արտաքսելու և Սիեթլում ՌԴ գխավոր հյուպատոսարանը փակելու որոշմանը, որը կայացվել էր ի աջակցություն բրիտանական իշխանությունների, որոնք Սոլսբերիում տեղի ունեցած հարձակման մեջ մեղադրում են Ռուսաստանին։
Նշենք, որ ՌԴ-ից արտաքսվելու են Մոսկվայում ԱՄՆ դեսպանատան 58 աշխատակից և Եկատերինբուրգում ամերիկյան հյուպատոսարանի երկու դիվանագետ։ Նրանք պետք է լքեն Ռուսաստանի տարածքը մինչև ապրիլի 5-ը։