Չինաստանը մաքսատուրքեր է սահմանում ամերիկյան մի շարք ապրանքների վրա
Չինաստանը մաքսատուրքեր է սահմանում ԱՄՆ-ից ներկրվող մի շարք ապրանքների վրա։ Այս մասին գրում է Ռիա Նովոստի-ն՝ հղում կատարելով Չինաստանի կենտրոնական հեռուստատեսությանը։
«Չինաստանի պետական խորհուրդը որոշել է 25% մաքսատուրք սահմանել ԱՄՆ-ից ներկրվող 14 տեսակի 106 անուն ապրանքների վրա, այդ թվում՝ սոյայի լոբու, ավտոմեքենաների, քիմիական արդյունաբերության ապրանքների վրա», - նշում է աղբյուրը։
Այս քայլը Պեկինի պատասխանն էր ԱՄՆ-ի կողմից չինական ապրանքների հարկային հավաքագրմանը։
Առևտրային այս միջոցառումների ժամկետները կախված են այն բանից, թե երբ Միացյալ Նահանգների իշխանությունները կհայտարարեն Չինաստանի ներկրվող ապրանքների վրա դրույքաչափեր սահմանելու մասին։
Ռիա Նովոստի-ն հիշեցնում է, որ այս տարվա մարտի սկզբին ԱՄՆ նախագահ Դոնալդ Թրամփը հուշագիր է ստորագրել «Չինաստանի տնտեսական ագրեսիայի դեմ պայքարի մասին»։ Փաստաթուղթն ընդունվել է ամերիկյան արտադրանքի մտավոր սեփականության իրավունքի խախտման հարցով Չինաստանի կառավարության նկատմամբ նախորդ տարվա օգոստոսին սկսված հետաքննության արդյունքում։ Այն թույլ է տալիս միակողմանի սահմանափակումներ մտցնել Չինաստանից ներկրվող ապրանքների վրա։
Օրեր առաջ ԱՄՆ-ը հրապարակեց չինական մոտ 1300 ապրանքներից կազմված մի ցուցակ, որտեղ նշված ապրանքների նկատմամբ կարող են սահմանվել ներկրման մաքսատուրքեր։ Այսպես ԱՄՆ-ը պատրաստվում է հաղթահարել Չինաստանի հետ բազմամիլիարդանոց առևտրային դեֆիցիտը։ Ամերիկյան վարչակազմի հաշվարկներով՝ նշված դրույքաչափերի սահմանումից հետո Չինաստանը կարող է կորցնել տարեկան մոտ 50 միլիարդ դոլար։
ԱՄՆ-ում նշում են, որ սա միայն առաջին քայլերն են առևտրի ոլորտում Չինաստանին հակազդելու հարցում։
Պեկինը բազմիցս հայտարարել է, որ չի ցանկանում առևտրային պատերազմի մեջ մտնել, սակայն պատրաստ է պաշտպանել սեփական ազգային շահերը։