Սաուդյան Արաբիայի թագավորը քննադատել է ամերիկյան դեսպանատունը Երուսաղեմ տեղափոխելու մասին Թրամփի որոշումը

Սաուդյան Արաբիայի թագավոր Սալման բին Աբդուլազիզ Ալ Սաուդը քննադատել է Իսրայելում ամերիկյան դեսպանատունը Թել Ավիվից Երուսաղեմ տեղափոխելու մասին ԱՄՆ նախագահ Դոնալդ Թրամփի որոշումը։ Այս մասին բին Սալմանը հայտարարել է Արաբական պետությունների լիգայի գագաթնաժողովի ժամանակ։

ԱՊԼ-ի գագաթնաժողովն անցկացվել է ապրիլի 15-ին սաուդական Դհահրան քաղաքում։

«Մենք կրկին մերժում ենք ամերիկյան վարչակազմի՝ ԱՄՆ դեսպանատունը Երուսաղեմ տեղափոխելու մասին որոշումը», - ասել է թագավորը։

Նրա խոսքով՝ Արևելյան Երուսաղեմը Պաղեստինի մայրաքաղաքն է։

ԱՄՆ նախագահ Դոնալդ Թրամփի՝ Երուսաղեմն Իսրայելի մայրաքաղաք ճանաչելուց հետո Պաղեստինի նախագահ Մահմուդ Աբբասը հայտարարել է, որ Պաղեստինը պատրաստվում է չեղարկել բոլոր համաձայնագրերը (այդ թվում՝ Օսլոյի համաձայնագիրը, - խմբ․) Իսրայելի հետ, եթե չփոխվի Երուսաղեմի շուրջ ստեղծված իրավիճակը։

Հիշեցնենք, որ ԱՄՆ նախագահ Դոնալդ Թրամփը նախորդ տարվա դեկտեմբերի 6-ին հայտարարել է, որ Երուսաղեմը ճանաչում է որպես Իսրայելի մայրաքաղաք, ինչպես նաև ցանկություն է հայտնել Թել Ավիվից այստեղ տեղափոխել ամերիկյան դեսպանատունը։

Դեկտեմբերի 18-ին ԱՄՆ-ը վետո էր դրել ՄԱԿ-ի Անվտանգության խորհրդի բանաձև վրա։ Վերջինս անօրինական էր համարում յուրաքանչյուր որոշում, որը ենթադրում է Երուսաղեմի կարգավիճակի փոփոխություն։ Բանաձևի տեքսում կոչ էր արվում բոլոր պետություններին հրաժարվել դիվանագիտական ներկայացուցչությունները Երուսաղեմ տեղափոխելու մտքից։ ԱՄՆ-ը ՄԱԿ-ի Անվտանգության խորհրդի 15 անդամներից միակն էր, որը դեմ քվեարկեց այս բանաձևին։   

Իսրայելը Երուսաղեմն արևելյան թաղամասերով հանդերձ համարում է իր «միակ և անբաժան մայրաքաղաքը», որը գրավվել է 1967 թ․ Վեցօրյա պատերազմի (հայտնի նաև որպես Երրորդ արաբաիսրայելական պատերազմ անվանումով, - խմբ․) ընթացքում։

Երուսաղեմի կարգավիճակի հարցը մերձավորարևելյան այս հակամարտության կարևորագույն կողմն է, որը պետք է կարգավորվի պաղեստինցիների հետ բանակցությունների հիման վրա։

Աղբյուր՝  https://ria.ru/world/20180415/1518690044.html