Սիրիայի ՀՕՊ համակարգերը կանխել են հրթիռային նոր հարձակում
Սիրիայի հակաօդային պաշտպանության համակարգերը կարողացել են հրթիռներ չեզոքացնել Հոմս նահանգում։ Այս մասին հաղորդել է սիրիական ՍԱՆԱ գործակալությունը։
Նշվում է, որ հրթիռի թիրախը եղել է Շայրաթ ավիաբազան։ Նախնական տեղեկությունների համաձայն՝ զոհեր, վիրավորներ և ավերածություններ չեն գրանցվել։
Ռիա Նովոստի-ի փոխանցմամբ՝ սիրիական բանակը կարողացել է կանխել ավիաբազայի վրա հարձակումը՝ ոչնչացնելով մոտ 10 հրթիռ։
Al Masdar News-ի հավաստմամբ՝ հարձակման հետևում կանգնած է Իսրայելը։ Լրատվականի տվյալներով՝ սիրիական բանակը պատասխան հարվածներ է հասցրել Շայրաթ ավիաբազան գրոհած ինքնաթիռի ուղղությամբ։
Al Mayadeen լրատվականի տեղեկություններով՝ հարձակման է ենթարկվել նաև Դամասկոսի հյուսիսում գտնվող Դումեյր օդանավակայանը։ Հեռուստաալիքի տվյալներով՝ հարձակումը տեղի է ունեցել հենց այն ժամանակ, երբ բանակցություններ էին վարվում այս շրջաններից ահաբեկիչների դուրսբերման հարցով։
Հիշեցնենք, որ ապրիլի լույս 14-ի գիշերը՝ 04:42-ից մինչև 06:10 ընկած ժամանակահատվածում, ԱՄՆ-ի, Մեծ Բրիտանիայի և Ֆրանսիայի նավերից և ինքաթիռներից Սիրիայի ռազմական օբյեկտների ուղղությամբ արձակվել է ավելի քան 100 հրթիռ, որոնցից 71-ը չեզոքացվել են սիրիական ՀՕՊ համակարգերի կողմից։
Վաշինգտոնը, Լոնդոնը և Փարիզը նշել են, որ հրթիռակոծությունը պատասխանն էր սիրիական Դումա քաղաքում իբր տեղի ունեցած քիմիական հարձակմանը։ Քիմիական հարձակում կատարելու վերաբերյալ ոչ մի ապացույց չի ներկայացվել։