Փարիզն այլևս չի պահանջում Ասադի հրաժարականը․ ՌԴ-ում Ֆրանսիայի դեսպան
Փարիզն այլևս չի պնդում, որ սիրիական հակամարտության կարգավորումը կապված է նախագահ Բաշար Ասադի հրաժարականի հետ։ Այս մասին «Կոմերսանտ» թերթին տված հարցազրույցի ժամանակ հայտարարել է Ռուսաստանում Ֆրանսիայի դեսպան Սիլվի Բերմանը։
«Մենք չենք որոշելու Սիրիայի ժողովրդի փոխարեն։ Այլևս խոսք չի գնում Բաշար Ասադի՝ առանց նախապայմանների հրաժարական տալու մասին», - ասել է Բերմանը։
Դեսպանի խոսքով՝ Ֆրանսիան դեմ է, որ ահաբեկիչների վերահսկողության տակ գտնվող տարածքները զինյալների հեռանալուց հետո անցնեն Դամասկոսի վերահսկողության տակ։ Նրա կարծիքով՝ Սիրիայի ապագան պետք է որոշվի քաղաքական ուժերի միջև կառուցողական երկխոսության միջոցով։
«Սոչիում սիրիական հակամարտության կարգավորման հարցով տեղի ունեցած համագումարում ձևավորված և Սիրիայի հարցով ՄԱԿ-ի հանձնակատարների կողմից հավանության արժանացած ճանապարհային քարտեզն իրենից ենթադրում է սսահմանադրական հանձնաժողովի ստեղծում, որը գրելու է Սիրիայի նոր սահմանադրությունը։ Սակայն ես կարծում եմ, որ սիրիական ռեժիմն այս հարցով դեռ չի զբաղվում», - ասել է դեսպանը։
ՄԱԿ-ի Անվտանգության խորհրդի 2254 թվակիր բանաձևը, որը հավանության է արժանացել ՄԱԿ-ի ԱԽ բոլոր անդամների կողմից, ենթադրում է սիրիական հակամարտության կարգավորում՝ երկրի բոլոր քաղաքական ուժերի միջև կառուցողական երկխոսության միջոցով։ Բանաձևում նշված է նաև նախագահական և խորհրդարանական նոր ընտրություններ անցկացնելու անհրաժեշտության և դրանց ժամկետների մասին։ Կոնկրետ անձանց, այդ թվում՝ Բաշար Ասադի ճակատագրի մասին բանաձևում խոսք չկա։