Իսլամական պետությունն ստանձնել է Իրաքի խորհրդարանի պատգամավորության թեկնածուի սպանության պատասխանատվությունը
«Իսլամական պետություն» ահաբեկչական խմբավորումն ստանձնել է Իրաքի խորհրդարանի պատգամավորի թեկնածու Ֆարուք ալ-Զարզուրի սպանության պատասխանատվությունը, որը տեղի է ունեցել խորհրդարանական ընտրություններից մեկ շաբաթ առաջ։ Այս մասին, ինչպես գրում է Ռիա Նովոստի-ն, հայտարարել են զինյալները։
Ավելի վաղ Նայնավ նահանգի աղբյուրները հայտնում էին, որ ալ-Զարզուրը սպանվել է իր տան մոտ, որը գտնվում է Մոսուլի հյուսիսային Լազակա գյուղի մոտ։ Նշվում է, որ պատգամավորության թեկնածուն սպանվել է առավոտյան աղոթքից տուն վերադառնալիս։
Սա առաջին դեպքն է, երբ Իսլամական պետության զինյալները հարձակում են կատարում Իրաքի նախընտրական քարոզարշավի մասնակցի վրա։
Իրաքի խորհրդարանական ընտրությունները, որոնք պետք է տեղի ունենային 2017 թ․ սեպտեմբերին, հետաձգվել են և տեղի են ունենալու այս ամսվա 12-ին։
Խորհրդարանի պատգամավորական 328 աթոռի համար պայքարելու են 6986 թեկնածուներ, որոնցից 2014-ը կին են։