Վլադիմիր Պուտինը շնորհավորել է Նիկոլ Փաշինյանին ՀՀ վարչապետի պաշտոնն ստանձնելու կապակցությամբ

Ռուսաստանի Դաշնության նախագահ Վլադիմիր Պուտինը շնորհավորել է Նիկոլ Փաշինյանին ՀՀ վարչապետի պաշտոնն ստանձնելու կապակցությամբ։ Ինչպես հայտնում է ՏԱՍՍ-ը՝ հղում կատարելով Կրեմլի մամուլի ծառայությանը, Պուտինը Փաշինյանին է ուղարկել շնորհավորական հեռագիր։

«Ակնկալում եմ, որ կառավարության ղեկավարի պաշտոնում Ձեր գործունեությունը կնպաստի մեր երկրների միջև դաշնակցային հարաբերությունների ամրապնդմանը ԱՊՀ-ի, ԵԱՏՄ-ի և ՀԱՊԿ-ի շրջանակներում», - նշել է ՌԴ նախագահը։

Ռուսաստանի վարչապետի պաշտոնակատար Դմիտրի Մեդվեդևը նույնպես շնորհավորել է Փաշինյանին ՀՀ վարչապետի պաշտոնում ընտրվելու կապակցությամբ։ Այս մասին հայտնել է ՌԴ կառավարության մամուլի ծառայությունը։

«Համոզված եմ, որ առևտրատնտեսական, գիտատեխնիկական և մշակութային հետագա համագործակցությունը, ամենատարբեր ոլորտներում իրականացվող ընդհանուր ծրագրերը, ինչպես նաև ԵԱՏՄ շրջանակներում համագործակցության ամրապնդումը ամբողջությամբ համապատասխան կլինեն Հայաստանի և Ռուսաստանի շահերին», - նշել է Մեդվեդևը։