Սիրիայի ՀՕՊ համակարգերը կարողացել են խոցել իսրայելական կողմի արձակած հրթիռների ավելի քան կեսը
Սիրիական հակաօդային պաշտպանութան համակարգերին հաջողվել է չեզոքացնել իսրայելական բանակի կողմից արձակած հրթիռների ավելի քան կեսը։ Այս մասին գրում է Ռիա Նովոստի-ն՝ հղում կատարելով ՌԴ պաշտպանության նախարարության հաղորդագրությանը։
«Ճշտվում է իրանական զինված խմբավորումներին և Սիրիայում գտնվող ռազմական ենթակառուցվածքներին հասցված վնասի չափը», - ասվում է ՌԴ ՊՆ հաղորդագրության մեջ։
Նշվում է, որ հարձակման են ենթարկվել Դամասկոսի հատվածում և երկրի հարավային շրջաններում գտնվող սիրիական ՀՕՊ համակարգերը և իրանական զինված խմբերը։
Օդային հարձակմանը մասնակցել են իսրայելական ռազմաօդային ուժերի F-15 և F-16 տեսակի 28 կործանիչներ, որոնք արձակել են մոտ 60 հրթիռ։
Իսրայելական բանակի պաշտոնական ներկայացուցիչ Յոնաթան Կոնրիկուսն այս հարձակումը համարում է վերջին տարիներին կատարված ամենամասշտաբային գործողությունը։
«Մեր նպատակն էր մեծ վնաս հասնել Սիրիայում Իրանի ռազմական պոտենցիալին», - ասել էր Կոնրիկուսը։
Ավելի վաղ Թել Ավիվը հայտարարել էր, որ Իրանը փորձում է Սիրիա տեղափոխել «շատ վտանգավոր զինատեսակներ, որպեսզի ոչնչացնի Իսրայելը»։