Սիրիայում ԱՄՆ-ի գլխավորած միջազգային կոալիցիայի ավիահարվածների հետևանքով խաղաղ բնակիչներ են զոհվել

ԱՄՆ-ի գլխավորած միջազգային կոալիցիայի ինքնաթիռները հարվածներ են հասցրել Սիրիայի Էլ Հասեքի շրջանի հարավում գտնվող գյուղերից մեկին, ինչի հետևանքով զոհվել է 8 մարդ։ Այս մասին, ինչպես գրում է Ռիա Նովոստի-ն, հայտնել է Սիրիայի պետական հեռուստատեսությունը։

Աղբյուրի փոխանցմամբ՝ ռմբակոծության է ենթարկվել Էլ Համադի գյուղը։

Մայիսի սկզբին ՍԱՆԱ գործակալությունը հայտնել էր, որ ամերիկյան կոալիցիայի ինքնաթիռները ռմբակոծության են ենթարկել Ալ Ֆադել գյուղը։ Այս դեպքում զոհվել էր 25 մարդ։

Ռիա Նովոստի-ն հիշեցնում է, որ ԱՄՆ-ի գլխավորած միջազգային կոալիցիան հաճախակի ռմբակոծության է ենթարկում սիրիական բնակավայրերը, ինչի հետևանքով զոհվում են բազամթիվ խաղաղ բնակիչներ։

ՌԴ արտգործնախարարությունը բազմիցս հայտարարել է, որ այս հարվածները տեղի են ունենում առանց ՄԱԿ-ի Անվտանգության խորհրդի բանաձևերի և պաշտոնական Դամասկոսի համաձայնության։

Հենց կոալիցիայում էլ խոստովանել են, որ 2014 թ․ սկսած Իրաքում և Սիրիայում իրենց կատարած օդային հարձակումների հետևանքով զոհվել է 883 խաղաղ բնակիչ։