Իրանը և ԵԱՏՄ-ը ստորագրել են ազատ առևտրի գոտի ստեղծելու մասին ժամանակավոր համաձայնագիր

Եվրասիական տնտեսական միությունը և Իրանը Աստանայի տնտեսական համաժողովի ընթացքում ստորագրել են ազատ առևտրի գոտի ստեղծելու վերաբերյալ ժամանակավոր համաձանագիր։ Այս մասին հայտնում է Ռիա Նովոստի-ն։

Սա ազատ առևտրի մշտական գոտու ձևավորման առաջին քայլն է։ Այն ենթադրում է մի շարք ապրանքների ներմուծման մաքսատուրքերի նվազեցում կամ զրոյացում։ Համաձայնագիրը թույլ է տալիս էականորեն մեծացնել առևտրաշրջանառության ծավալները, ինչը նախորդ տարի կազմում էր 2,7 միլիարդ դոլար։

«Ժամանակավոր համաձայնագրում նախատեսվում է մշակել խնդիրների լուծման արդյունավետ մեխանիզմներ։ Բիզնես-երկխոսության համար ստեղծվելու է կոմիտե՝ բաղկացած երկու կողմերի բարձրաստիճան պաշտոնյաներից», - ասել է Եվրասիական տնտեսական հանձնաժողովի (ԵԱՏՀ) կոլեգիայի նախագահ Տիգրան Սարգսյանը։

Ժամանակավոր համաձայնագիրը գործելու է երեք տարի։ Այս ժամանակամիջոցում կողմերը պետք է պայմանավորվեն ամբողջական համաձայնագրի շուրջ։