Իսրայելական բանակը մեծ ուժով կպատասխանի Գազայի հատվածից կատարվող հրթիռային հարձակումներին․ Նեթանյահու
Իսրայելի բանակն ուժով կպատասխանի Գազայի հատվածից սեփական տարածքների հրթիռակոծությանը։ Նման հայտարարութամբ է հանդես եկել Իսրայելի վարչապետ Բենիամին Նեթանյահուն։
«Իսրայելն անհրաժեշտ լրջությամբ է նայում ՀԱՄԱՍ և «Իսլամական ջիհադ» ծայրահեղական խմբավորումների կողմից կատարվող հարձակումներին, և Իսրայելի պաշտպանության բանակը մեծ ուժով կպատասխանի դրանց», - հայտարարել է Նեթանյահուն։
Ավելի վաղ իսրայելական բանակի մամուլի ծառայությունից հայտնում էին, որ մայիսի 29-ին Գազայի հատվածից հրեական պետության տարածք է արձակվել 28 հրթիռ, որոնցից մեկն ընկել է սահմանամերձ բնակավայրերից մեկի մանկապարտեզի տարածք։ Բարեբախտաբար, տուժածներ չկան․ մանկապարտեզի տարածքում այդ պահին մարդ չի եղել։ Նշվում է, որ իսրայելական հակաօդային պաշտպանության համակարգերը կարողացել են չեզոքացնել հրթիռների մեծ մասը։