Սինգապուրը կարող է վճարել ԱՄՆ-ի և ԿԺԴՀ-ի գագաթնաժողովի ընթացքում կողմերի պատվիրակությունների կեցության ծախսերի մի մասը

Սինգապուրը կարող է իր վրա վերցնել ԱՄՆ-ի և Հյուսիսային Կորեայի պատվիրակությունների կեցության ծախսերի մի մասը։ Այս մասին հայտարարել է Սինգապուրի պաշտպանության նախարարը՝ խոսելով Դոնալդ Թրամփի և Կիմ Չեն Ընի առաջիկա հանդիպման մասին։

«Այդ ծախսերը միայն մի փոքր մասն են այն ամենի, ինչը մենք ցանկանում ենք անել այդ պատմական գագաթնաժողովի համար», - ասել է նախարարը։

ՏԱՍՍ-ը հիշեցնում է, որ այս օրերին Սինգապուրում խորհրդակցություններ են անցկացնում ԱՄՆ-ի և ԿԺԴՀ-ի պատվիրակությունները։ Կողմերը համաձայնեցնում են առաջիկա հանդիպման օրակարգը։

Միևնույն ժամանակ The Washington Post պարբերականը գրում է, որ ամերիկյան պատվիրակությունը ցանկանում է վճարել Սինգապուրում գագաթնաժողովի օրերին Կիմ Չեն Ընի կեցության համար։ Նշվում է, որ Հյուսիսային Կորեայի առաջնորդը կարող է իջևանել Fullerton հինգաստղանի հյուրանոցում։ Այստեղ նախագահական սենյակի արժեքը մեկ գիշերվա համար կազմում է 6 հազար դոլար։

Աղբյուր՝  http://tass.ru/mezhdunarodnaya-panorama/5257766