Պենտագոնը հերքում է սիրիական բանակի դիրքերին ավիահարվածներ հասցնելու մասին լուրերը

ԱՄՆ-ի գլխավորած միջազգային հակաահաբեկչական կոալիցիան հարվածներ չի հասցրել սիրիական Բու Քեմալի շրջանում։ Այս մասին ՏԱՍՍ-ի թղթակցի հետ զրույցում հայտարարել է Պենտագոնի մամուլի ծառայության ներկայացուցիչ Ադրիան Ռենկին-Հելոուերը։

«Մենք (ԱՄՆ-ը կամ կոալիցիան) հարվածներ չենք իրականացրել Բու Քեմալում», - ասել է Պենտագոնի ներկայացուցիչը՝ պատասխանելով ՏԱՍՍ-ի թղթակցի խնդրանքին՝ մեկնաբանել սիրիական լրատվամիջոցներում տեղ գտած լուրերը սիրիական բանակի դիրքերին ավիահարվածներ հասցնելու մասին։

Հիշեցնենք, որ ավելի վաղ սիրիական ՍԱՆԱ գործակալությունը հայտնել էր, որ ԱՄՆ-ի գլխավորած միջազգային կոալիցիան ավիահարվածներ է հասցրել սիրիական բանակի՝ Բու Քեմալում գտնվող դիրքերին։ Աղբյուրը հայտնել էր նաև տեղի ունեցածի հետևանքով զոհերի և վիրավորների մասին։

ՏԱՍՍ-ը գրում է, որ այս տարվա սկզբից Դեր Զորում, Էլ Հասեկիում և Ռաքքայում բազմաթիվ սիրիացիներ են զոհվել և վիրավորվել ԱՄՆ-ի և դաշնակիցների իրականացրած ավիահարվածների հետևանքով։ Սիրիայի կառավարությունը բազմիցս դիմել է ՄԱԿ-ի Անվտանգության Խորհրդին, որպեսզի վերջինս դատապարտի ԱՄՆ-ի և դաշնակիցների այս գործողությունները, ինչի հետևանքով զոհվում են խաղաղ բնակիչներ։

Աղբյուր՝  http://tass.ru/mezhdunarodnaya-panorama/5299651