ԱՄՆ-ի գլխավորած կոալիցիան հրթիռակոծել է սիրիական բնակավայրը․ կան զոհեր

ԱՄՆ-ի գլխավորած միջազգային կոալիցիան ավիահարվածներ է հասցրել սիրիական Դեր Զոր նահանգի Ալ Շաաֆ գյուղին, ինչի հետևանքով զոհվել է 8 մարդ։ Այս մասին, ինչպես գրում է Ռիա Նովոստի-ն, հայտնել է ՍԱՆԱ գործակալությունը։

Նշվում է, որ հարվածների հետևանքով ավերվել են շենքեր։ Վիրավորների թվի մասին տեղեկություններ դեռ չեն հաղորդվում։

Աղբուրը հայտնում է նաև, որ հրթիռակոծության են ենթարկվել Սիրիայի կառավարական ուժերի՝ Հոմս նահանգում գտնվող դիրքերը։ Ինչպես գրում է Ռիա Նովոստի-ն, զոհվել է սիրիական բանակի մեկ սպա։

Հրթիռակոծությունն սկսվել է այն բանից հետո, երբ սիրիական կողմը գնդակոծել է ամերիկյան երեք մեքենաներ, որոնք շարժվում էին դեպի Ալ Հալբա։

Լրատվականը գրում է, որ սա առաջին դեպքն է, երբ Սիրիայի կառավարական ուժերը և ամերիկացի զինվորականները բախվում են ցամաքում։

Սիրիական լրատվամիջոցների փոխանցմամբ՝ սա այս շաբաթվա ընթացքում արդեն երկրորդ դեպքն է, որ ամերիկյան կոալիցիան գնդակոծում է կառավարական ուժերի դիրքերը։

Պենտագոնում այս տեղեկությունները հերքում են։