Թրամփը կոչ է արել ՆԱՏՕ-ի դաշնակիցներին ավելացնել պաշտպանական ծախսերը․ NYT

ԱՄՆ նախագահ Դոնալդ Թրամփը ՆԱՏՕ-ի անդամ մի շարք դաշնակից  պետությունների ղեկավարներին նամակներ է ուղարկել՝ քննադատելով նրանց Դաշինքի շրջանակներում պաշտպանական ծախսերի նպատակով Վաշինգտոնի համեմատ շատ քիչ միջոցներ տրամադրելու համար։ Այս մասին գրում է ՏԱՍՍ-ը՝ հղում կատարելով The New York Times թերթին։

Նշվում է, որ նախորդ ամսին Թրամփը նամակներ է ուղարկել Գերմանիային, Բելգիային, Կանադային և Նորվեգիային։

«Նամակներում նախագահ Թրամփը հասկացրել է, որ Միացյալ Նահանգների համբերությունն սպառվում է կապված այն բանի հետ, որ Վաշինգտոնի դաշնակիցները չեն ցանկանում ավելացնել պաշտպանական ծախսերը», - գրում է թերթը։

Մասնավորապես՝ Անգելա Մերկելին ուղարկած նամակում Թրամփը նշել է․ «Ինչպես մենք քննարկել ենք Ձեր՝ Վաշինգտոն կատարած այցի ժամանակ, Միացյալ Նահանգները հիասթափություն է ապրում, քանի որ որոշ դաշնակիցներ չեն ավելացրել պաշտպանական ծախսերը, ինչպես խոստացել էին նախկինում։ Գերմանիայի կողմից պաշտպանական ծախսերի շարունակական ոչ բավարար տրամադրումը խաթարում է Դաշինքի անվտանգությունը, ինչպես նաև նման մոտեցման օրինակ է ծառայում մյուս դաշնակիցների համար, որոնք նույնպես չեն ցանկանում կատարել իրենց պաշտպանական պարտավորությունները»։

Թրամփի խոսքով՝ գնալով ավելի դժվար է լինելու ԱՄՆ-ի քաղաքացիներին բացատրել, թե ինչու որոշ երկրներ «իրենց լուման չեն ներդնում ՆԱՏՕ-ի հավաքական պաշտպանության գործում, մինչդեռ ամերիկացի զինծառայողները շարունակում են զոհել իրենց կյանքն արտասահմանում»։