Պեկինը Վաշինգտոնին մեղադրում է պատմության ամենախոշոր առևտրային պատերազմն սկսելու մեջ
Չինաստանի իշխանությունները ստիպված են քայլեր ձեռնարկել ի պատասխան ԱՄՆ-ի կողմից չինական ապրանքների ներկրման վրա ընդհանուր հաշվով 34 միլիարդ դոլարի լրացուցիչ մաքսատուրքեր սահմանելուն, ինչպես նաև տեղեկացնել Առևտրի համաշխարհային կազմակերպությանը ստեղծված իրավիճակի վերաբերյալ։ Այս մասին ասվում է Չինաստանի առևտրի նախարարության տարածած հայտարարության մեջ։
«Չինաստանը պարտավորվել է չարձակել առաջին կրակոցը, սակայն սեփական երկրի շահերի պաշտպանության համար ստիպված է ձեռնարկել անհրաժեշտ պատասխան քայլեր։ Միևնույն ժամանակ մենք ԱՀԿ-ին տեղյակ ենք պահելու ստեղծված իրավիճակի մասին, քայլելու ենք աշխարհի հետ միասին՝ պաշտպանելով ազատ առևտրի բազմակողմ համակարգը», - ասվում է տարածված հայտարարության մեջ։
Չինաստանի առևտրի նախարարությունում նաև նշում են, որ ԱՄՆ-ը, չինական ապրանքների ներկրման վա լրացուցիչ մաքսատուրքեր սահմանելով, սանձազերծել է պատմության ամենախոշոր առևտրային պատերազմը։
«ԱՄՆ-ը խախտել է Առևտրի համաշխարհային կազմակերպության նորմերը՝ այդպիսով սկզիբ դնելով պատմության ամենամասշտաբային առևտրային պատերազմին։ Մաքսատուրքերի սահմանումը առևտրային ահաբեկման օրինակ է։ Այն լուրջ վնաս է հասցնում արտադրական համաշխարհային շղթաների անվտանգությանը և խանգարում է համաշխարհային տնտեսության վերականգնման գործընթացին», - նշվում է հայտարարության մեջ։
Այսօր՝ հուլիսի 6-ին, ուժի մեջ է մտել չինական ապրանքների ներկրման վրա լրացուցիչ՝ 25%-անոց մաքսատուրքեր սահմանելու մասին ԱՄՆ նախագահ Դոնալդ Թրամփի որոշումը։ Այս որոշման վնասի ընդհանուր չափը գնահատվում է 34 միլիարդ դոլար։
Թրամփի կարծիքով այս նոր սահմանափակումները կօգնեն վերացնել ԱՄՆ-ի պակասորդը Չինաստանի հետ երկկողմ առևտրաշրջանառության մեջ, որը կազմում է տարեկան շուրջ 500 միլիարդ դոլար։
Պեկինն, իր հերթին, հայտարարել է, որ վճռական պատասխան կտա Վաշինգտոնին, քանի որ վերջինիս քայլերը վնաս են հասցնում Չինաստանի ազգային շահերին։
Աղբյուր՝ http://tass.ru/ekonomika/5351677