Թուրքիայում Գյուլենական շարժման հետ կապեր ունենալու կասկածանքով ձերբակալության հրաման է արձակվել 346 մարդու նկատմամբ

Ստամբուլի և Իզմիրի դատախազությունները հրաման են արձակել 346 մարդու ձերբակալության մասին։ Այս անձինք, որոնց թվում են ներկա և նախկին զինվորականներ, կասկածվում են Գյուլենական շարժման հետ առնչություն ունենալու մեջ։ Այս մասին հայտնում է Anadolu գործակալությունը՝ հղում կատարելով իրավապահ մարմիններին։

Նշվում է, որ 271 մարդու ձերբակալության հրամանն արձակել է Ստամբուլի դատախազությունը։ Նրանց թվում կա պաշտոնաթող գեներալ, ներկայում ծառայող 122 զինվորականներ, ռազմական ակադեմիաների 120 կուրսանտներ և աշխատանքից հեռացված 29 զինվորականներ։ Գործողություններն իրականացվում են Թուրքիայի 47 նահանգներում։

Իզմիրի դատախազությունն արձակել է 75 մարդու ձերբակալության հրաման, որոնց հայտնաբերման ուղղությամբ աշխատանքներ են կատարվում Թուրքիայի 30 նահանգներում։ Այս 75 կասկածյալների թվում կան ներկայում ծառայող 59 զինվորականներ։

Հիշեցնենք, որ 2016 թ․ հուլիսի 15-ին Թուրքիայում զինվորականները հեղաշրջման փորձ են կազմակերպել։ Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։ Թուրքիայի իշխանությունները հեղաշրջման փորձի կազմակերպման մեջ մեղադրում են Թուրքիայում արդի իսլամական գաղափարախոսության հիմնադիր Ֆեթուլլահ Գյուլենին, որը 1998 թվականից բնակվում է ԱՄՆ-ում։ Թուրքիայի նախագահ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։  

Հեղաշրջման փորձից հետո Թուրքիայում ձերբակալվել է ավելի քան 50 հազար մարդ, աշխատանքից հեռացվել՝ շուրջ 140 հազար պետաշխատող։