Թուրքիան խոստանում է պատասխանել Ս-400-ի գնման դեպքում ԱՄՆ-ի հնարավոր պատժամիջոցներին
Թուրքիան միջոցներ կձեռնարկի ԱՄՆ-ի դեմ, եթե վերջինս որոշի պատժամիջոցներ կիրառել Անկարայի նկատմամբ՝ կապված ռուսական Ս-400 զենիթահրթիռային համակարգերի ձեռքբերման հետ։ Այս մասին Anadolu գործակալությանը տված հարցազրույցի ժամանակ հայտարարել է Թուրքիայի արտաքին գործերի նախարար Մևլութ Չավուշօղլուն։
«Նրանք ասում են՝ «դուք ձեռք եք բերում Ս-400-ը, մենք՝ պատժամիջոցներ ենք սահմանում»։ Եթե դուք պատժամիջոցներ սահմանեք, ապա կտեսնեք մեր պատասխանը։ Եթե ցանկանում եք նման հարաբերություններ, ապա դա ձեր որոշումն է», - ասել է Չավուշօղլուն՝ պատասխանելով Ս-400-ի գնման դեպքում Վաշինգտոնի հնարավոր պատժամիջոցների մասին հարցին։
Նա նաև հույս է հայտնել, որ ԱՄՆ-ի իշխանությունները չեն փչացնի հարաբերությունները Թուրքիայի հետ Ս-400-ի պատճառով։
Հիշեցնենք, որ նախորդ տարվա դեկտեմբերին Թուրքիան և Ռուսաստանը համաձայնագիր են կնքել Ս-400-ի ձեռքբերման վերաբերյալ։ Ըստ համաձայնագրի՝ Անկարան պետք է գնի զենիթահրթիռային այս համակարգի երկու մարտկոց։
Միացյալ Նահանգները և ՆԱՏՕ-ն բազմիցս քննադատել են Թուրքիային այս համաձայնագրի համար։ ԱՄՆ պետքարտուղարի օգնական Ուես Միթչելի խոսքով՝ Ս-400-ի ձեռքբերումը կարող է բացասականորեն ազդել ամերիկյան Ֆ-35 կործանիչների՝ Թուրքիա մատակարարման վրա։
Ի պատասխան՝ Անկարան հայտարարեց, որ միջոցներ կձեռնարկի, եթե Միացյալ Նահանգները փորձի կենսագործել հնչեցրած սպառնալիքները։