Իսրայելի պաշտպանության նախարարը «լրատվամիջոցներից է իմացել» Սիրիային հասցված ավիահարվածների մասին
Իսրայելի պաշտպանության նախարար Ավիգդոր Լիբերմանը հայտարարել է, որ «թերթերից է իմացել, թե իսրայելական ռազմաօդային ուժերը հարվածներ են հասցրել սիրիական Հոմս նահանգում գտնվող ավիաբազային»։
«Ես գաղափար չունեմ, այսօր լրատվամիջոցներում եմ կարդացել այդ մասին», - ասել է Լիբերմանը։
Ավելի վաղ իսրայելական կողմը հրաժարվել էր մեկնաբանել սիրիական Հոմս նահանգի ավիաբազային Իսրայելի ռազմաօդային ուժերի հասցած հարվածների մասին ԶԼՄ-ներում տեղ գտած լուրերը։
«Մենք չենք մեկնաբանում օտար լրատվամիջոցների հրապարակած լուրերը», - ասել էր Իսրայելի պաշտպանության բանակի մամուլի ծառայության ներկայացուցիչը։
Ավելի վաղ սիրիական ՍԱՆԱ գործակալությունը գրել էր, որ իսրայելական ռազմաօդային ուժերը գրոհել են Հոմս նահանգի Թիֆոր (T-4) ավիաբազան։
Ըստ ՍԱՆԱ-ի՝ հարձակման հետևանքով սիրիական կողմից զոհեր և վիրավորներ չեն գրանցվել։ Հասցվել է միայն նյութական վնաս, որի չափը ճշտվում է։