ԱՄՆ-ը որոշել է նոր՝ 200 միլիարդ դոլարի մաքսատուրքեր սահմանել Չինաստանից ապրանքների ներկրման վրա

ԱՄՆ-ի իշխանությունները որոշել են լրացուցիչ 200 միլիարդ դոլարի մաքսատուրքեր սահմանել Չինաստանից ապրանքների ներկրման վրա։ Այս մասին գրում է The Wall Street Journal-ը։

Հաղորդվում է, որ սա ԱՄՆ-ի պատասխանն է Չինաստանի կողմից ամերիկյան ապրանքների ներկրման վրա 25% լրացուցիչ մաքսատուրք սահմանելու որոշմանը։ Աղբյուրը նշում է, որ Վաշինգտոնը հույս ունի շարունակել բանակցությունները Պեկինի հետ առևտրային քաղաքականության հարցով։

Չինաստանում անմիջապես արձագանքել են մաքսատուրքերի հնարավոր ավելացման մասին լուրերին։ Առևտրի նախարարությունը հայտարարություն է տարածել՝ նշելով, որ իրենք ցնցված են ԱՄՆ-ի առևտրային քաղաքականությունից և պատաստվում են ձեռնարկել անհրաժեշտ պատասխան քայլերը։

«ԱՄՆ-ի գործողությունները վնասում են ոչ միայն Չինաստանին և ամբողջ աշխարհին, այլև հենց իրենց։ Նման ոչ ռացիոնալ գործելակերպով հնարավոր չէ հեղինակություն և վստահություն վայելել», - ասվում է նախարարության տարածած հայտարարության մեջ։

Հիշեցնենք, որ Չինաստանի և ԱՄՆ-ի միջև փոխադարձ ավելացված մաքսատուրքերն ուժի մեջ են մտել  հուլիսի 6-ից։

Այս տարվա ապրիլի սկզբին ԱՄՆ-ը հրապարակել է չինական 1300 անուն ապրանքներից բաղկացած ցուցակ, որոնց ներկրման վրա կարող են սահմանվել լրացուցիչ մաքսատուրքեր։

Ի պատասխան՝ Պեկինը որոշեց 25%-ով բարձրացնել ամերիկյան 106 անուն ապրանքների ներկրման մաքսատուրքերը։

Արդեն մայիսին կողմերը համաձայնեցին, որ առևտրային պատերազմ չի լինելու, սակայն ավելի ուշ պարզ դարձավ, որ առևտրային հարցերում համաձայնության հասնել չի հաջողվել, և Վաշինգտոնը հայտարարեց լրացուցիչ մաքսատուրքերի սահմանման մասին։

Հունիսի կեսին Միացյալ Նահանգները 25%-անոց մաքսատուրքեր սահմանեց չինական ապրանքների ներկրման վրա, ինչն ազդեց ԱՄՆ ներկրվող չինական ապրանքների 10%-ի վրա։

Չինաստանն անմիջապես հայտարարեց, որ 25% մաքսատուրք է սահմանվում ամերիկյան 659 անուն ապրանքների ներկրման վրա։