Իսրայելի ռազմաօդային ուժերը գրոհել են սիրիական բանակի դիրքերը

Հուլիսի լույս 12-ի գիշերը իսրայելական ռազմաօդային ուժերի ինքնաթիռները հրթիռային հարվածներ են հասցրել Սիրիայի ռազմական օբյեկտներին։ Այս մասին գրում է Ռիա Նովոստի-ն՝ հղում կատարելով սիրիական ՍԱՆԱ գործակալությանը։

Նշվում է, որ դեպքը տեղի է ունեցել սահմանային Կունեյթրա նահանգի Հադեր և Թել Քրում Ջեբա բնակավայրերի մոտ։ Սիրիայի հակաօդային պաշտպանության ուժերին հաջողվել է հետ մղել գրոհը։

Իսրայելական կողմն, իր հերթին, հայտարարել է, որ օդային հարձակման է ենթարկել սիրիական բանակի երեք դիրք։ Թել Ավիվը նշում է, որ հարձակումը կատարվել է ի պատասխան օրեր առաջ սիրիական կողմից անօդաչու թռչող սարքի՝ Իսրայելի օդային տարածք ներխուժմանը։

Ավելի վաղ սիրիական լրատվամիջոցները տեղեկություններ էին տարածել, որ Իսրայելի ռազմաօդային ուժերը գրոհել են Հոմս նահանգում գտնվող T-4 ավիաբազան։ Սիրիական կողմին հաջողվել էր կանխել գրոհը։

Իսրայելի պաշտպանության բանակի ներկայացուցիչները հրաժարվել էին մեկնաբանել տարածված լուրերը՝ նշելով, որ իրենք որևէ կապ չունեն հնարավոր հարձակման հետ։