ՀՆԱ-ի 4%-ը պաշտպանությանը տրամադրելով աշխարհն ավելի անվտանգ չի դառնա․ Գերմանիայի ԱԳ նախարար
ՆԱՏՕ-ի անդամ պետությունների կողմից պաշտպանական ծախսերի մինչև ՀՆԱ-ի 4%-ի չափ ավելացնելն աշխարհը չի դարձնի ավելի անվտանգ։ Այս մասին հայտարարել է Գերմանիայի արտաքին գործերի նախարար Հայկո Մաասը։
«Մենք գիտենք, որ խաղաղությունը և անվտանգությունն անվճար չեն տրվում, սակայն ՀՆԱ-ի 4%-ը պաշտպանությանը հատկացնելով աշխարհը չի դառնա ավելի անվտանգ։ Դրա փոխարեն մենք պետք է հարգենք միջազգային կարգուկանոնը», - իր թվիթերյան էջում գրել է Մաասը։
Հուլիսի 11-ին ՆԱՏՕ-ի գագաթնաժողովի առաջին օրվա արդյունքում Դաշինքի անդամ պետությունները (բացառությամբ ԱՄՆ-ի) հաստատել են ռազմական ծախսերը մինչև 2024 թ․ ընդհանուր 266 միլիարդ դոլարի հասցնելու մասին ծրագրերը։
ԱՄՆ նախագահ Դոնադ Թրամփը բազմիցս քննադատել է ՆԱՏՕ-ի անդամ պետություններին, քանի որ վերջիններս բավարար միջոցներ չեն տրամադրում հավաքական պաշտպանության համար։ Նա Դաշինքի անդամ պետություններից պահանջել էր պաշտպանական ծախսերն ավելացնել՝ հասցնելով ՀՆԱ-ի 2%-ի։
ՆԱՏՕ-ում ունեցած ելույթի ժամանակ, սակայն, Թրամփը պահանջեց, որ պաշտպանական ծախսերն ավելացվեն մինչև ՀՆԱ-ի 4%-ի չափ։