Թուրքիայի ԱԳՆ-ն ԱՄՆ-ն կոչ է անում չձգձգել Գյուլենական շարժման դեմ պայքարի հարցը
Միացյալ Նահանգները չպետք է դանդաղի «Գյուլենական ահաբեկչական կազմակերպության» դեմ պայքարի հարցում։ Այս մասին հայտարարել է Թուրքիայի արտաքին գործերի նախարարությունը։
«Անկարայում կայացած Թուրքիա-ԱՄՆ բանակցությունների ժամանակ մենք նշել ենք, որ անթույլատրելի է Գյուլենական շարժման դեմ պայքարի հարցում հապաղելը», - ասվում է Թուրքիայի արտաքին քաղաքական գերատեսչության տարածած հայտարարության մեջ։
Հիշեցնենք, որ Անկարան 2016 թ․ հուլիսի 15-ին տեղի ունեցած հեղաշրջման փորձի կազմակերպման մեջ մեղադրում է արդի իսլամական գաղափարախոսության հիմնադիր Ֆեթուլլահ Գյուլենին, որը 1999 թվականից բնակվում է ԱՄՆ-ում։
Թուրքիայի նախագահ Ռեջեփ Թայիփ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերիկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։