Չինաստանը խոստանում է պատասխանել առևտրի ոլորտում ԱՄՆ-ի հնարավոր սահմանափակումներին
Չինաստանի իշխանությունները պատասխան միջոցառումներ կձեռնարկեն, եթե հետագայում Միացյալ Նահանգները առևտրին խոչընդոտող քայլեր ձեռնարկի։ Այս մասին հայտարարել է Չինաստանի արտաքին գործերի նախարարության մամուլի խոսնակ Գեն Շուանը։
Նրա խոսքով՝ առևտրային հարցերում ԱՄՆ-ի ճնշումները չեն աշխատի, իսկ Պեկինը «մշտապես ցանկանում է նման հարցերը լուծել երկխոսության միջոցով»։
ԱԳՆ մամուլի խոսնակն ընդգծել է նաև, որ Չինաստանն ու ԱՄՆ-ը միավորել են ջանքերը Կորեական թերակղզում իրավիճակը կագվորելու հարցում։
«Չինաստանը մեծ ջանքեր է ներդրել։ Փաստացի, Վաշինգտոնը և Պեկինը սերտորեն համագործակցում են այս հարցում։ Կարծում եմ՝ շահագրգիռ բոլոր կողմերը կաշխատեն Չինաստանի հետ, որպեսզի խթանեն Կորեական թերակղզում իրավիճակի կայունացմանը և ապամիջուկայնացման ծրագրի կենսագործմանը», - հավելել է դիվանագետը։
Հիշեցնենք, որ ավելի վաղ ԱՄՆ նախագահ Դոնալդ Թրամփը հատարարել էր, որ Չինաստանը խնդիրներ է ստեղծում Վաշինգտոնի համար Փհենյանի հետ Կորեական թերակղզու ապամիջուկայնացման հարցով բանակցություններում։
Ֆլորիդա նահանգում իր կողմնակիցների առջև ունեցած ելույթի ժամանակ Թրամփը դրական է գնահատել Վաշինգտոնի և Փհենյանի միջև ապամիջուկայնացման հարցով բանակցությունները՝ միևնույն ժամանակ նշելով, որ «Չինաստանը կարող է այս հարցում խոչընդոտել երկու երկրների առաջընթացին»։
Հունիսի 12-ին Սինգապուրի Capella հյուրանոցում տեղի է ունեցել ԱՄՆ նախագահ Դոնալդ Թրամփի և Հյուսիսային Կորեայի առաջնորդ Կիմ Չեն Ընի հանդիպումը։ Հանդիպման արդյունքում ստորագրվել է փաստաթուղթ, ըստ որի՝ պետք է անհապաղ սկսվի Կորեական թերակղզու ամբողջական ապամիջուկայնացումը։ Միացյալ Նահանգներն, իր հերթին, խոստացել է ապահովել Հյուսիսային Կորեայի անվտանգությունը։