Պեկինը Վաշինգտոնին սպառնում է ներկրման նոր մաքսատուրքերի սահմանմամբ
ԱՄՆ-ի կողմից ապրանքների ներկրման մաքսատուրքերի սահմանման դեպքում Չինաստանը պատրաստ է պատասխան քայլեր ձեռնարկել։ Այս մասին ասվում է Չինաստանի առևտրի նախարարության տարածած հայտարարության մեջ։
«Չինաստանի պետական խորհրդի՝ մաքսային սակագների հարցերով հանձնաժողովը որոշել է 5207 անուն ամերիկյան ապրանքների նկատմամբ սահմանել ներկրման բարձրացված 25, 20, 10 և 5 տոկոսանոց մաքսատուրքեր՝ ընդհանուր 60 միլիարդ դոլար ծավալով», - ասվում է նախարարության հայտարարության մեջ։
Նշվում է, որ 25%-անոց մաքսատուրքերը գործելու են 2493 անուն ապրանքների, այդ թվում՝ բնական մեղրի, սառեցված ոլոռի և հատապտուղների, կակաոյի յուղի և կաթի սերուցքի նկատմամբ։ 20%-անոց մաքսատուրքերը գործելու են 1078 անուն ապրանքների, այդ թվում՝ թռչնի փետուրների, բուսական մեղրի և մաստակների նկատմամբ։
10%-անոց մաքսատուրքերը գործում են 974 տեսակ ապրանքների, այդ թվում՝ սառեցված քաղցր եգիպտացորենի և բրնձի ալյուրի նկատմամբ։
«Եթե Միացյալ Նահանգները գործի առանց աշվի առնելու մյուսների կարծիքը և իրականություն դարձնի մաքսային սակագների բարձրացումը, ապա Չինաստանն անմիջապես կյանքի կկոչի վերոնշյալ մաքսատուրքերը», - ասվում է հայտարարության մեջ։
Հիշեցնենք, որ Չինաստանի և ԱՄՆ-ի միջև փոխադարձ ավելացված մաքսատուրքերն ուժի մեջ են մտել հուլիսի 6-ից։
Այս տարվա ապրիլի սկզբին ԱՄՆ-ը հրապարակել է չինական 1300 անուն ապրանքներից բաղկացած ցուցակ, որոնց ներկրման վրա կարող են սահմանվել լրացուցիչ մաքսատուրքեր։
Ի պատասխան՝ Պեկինը որոշեց 25%-ով բարձրացնել ամերիկյան 106 անուն ապրանքների ներկրման մաքսատուրքերը։
Արդեն մայիսին կողմերը համաձայնեցին, որ առևտրային պատերազմ չի լինելու, սակայն ավելի ուշ պարզ դարձավ, որ առևտրային հարցերում համաձայնության հասնել չի հաջողվել, և Վաշինգտոնը հայտարարեց լրացուցիչ մաքսատուրքերի սահմանման մասին։
Հունիսի կեսին Միացյալ Նահանգները 25%-անոց մաքսատուրքեր սահմանեց չինական ապրանքների ներկրման վրա, ինչն ազդեց ԱՄՆ ներկրվող չինական ապրանքների 10%-ի վրա։
Չինաստանն անմիջապես հայտարարեց, որ 25% մաքսատուրք է սահմանվում ամերիկյան 659 անուն ապրանքների ներկրման վրա։
Աղբյուր՝ https://ria.ru/economy/20180803/1525904440.html?referrer_block=index_main_3