Թուրքիան շարունակելու է ամրապնդել հարաբերությունները Ռուսաստանի հետ․ Չավուշօղլու
Թուրքիան շարունակելու է ամրապնդել հարաբերությունները Ռուսաստանի հետ։ Այս մասին հայտարարել է Թուրքիայի արտաքին գործերի նախարար Մևլութ Չավուշօղլուն։
«Մենք շարունակելու ենք մեր քայլերը Ռուսաստանի հետ կապերն ամրապնդելու ուղղությամբ։ Մեր քաղաքականությունը բաց և թափանցիկ է։ Այն խթանում է երկու երկրների ընդհանուր շահերը և դրական արդյունքի հասնելու ձգտումները։ Այս վստահության քաղաքականության շրջանակներում մենք ՌԴ-ի հետ հանգիստ քննարկում ենք բոլոր տարաձայնությունները», - Անկարայում հավատարմագրված դեսպանների հետ հանդիպման ժամանակ հայտարարել է Չավուշօղլուն։
Հիշեցնենք, որ ՌԴ արտաքին գործերի նախարար Սերգեյ Լավրովը օգոստոսի 14-ին Անկարայում հանդիպում կունենա թուրք գործընկերոջ հետ, ինչպես նաև ելույթ կունենա թուրք դեսպանների և միջազգային կազմակերպություններում Թուրքիայի մշտական ներկայացուցիչների հետ խորհրդակցությանը։
Երկու նախարարներն, ի թիվս այլ հարցերի, քննարկելու են Սիրիայում համագործակցությունը, երկու երկրների տնտեսական կապերի զարգացումը, ինչը կարևոր է հատկապես Անկարայի և Վաշինգտոնի միջև սկսված տնտեսական պատերազմի ֆոնին։