ԱՄՆ-ը ցանկանում է հաճախակիացնել Սև ծովում Ուկրաինայի և Վրաստանի մասնակցությամբ զորավարժությունները
Միացյալ Նահանգները դիտարկում է Սև ծովում Ուկրաինայի և Վրաստանի մասնակցությամբ ավելի հաճախ զորավարժություններ անցկացնելու հնարավորությունը՝ տարածաշրջանում Ռուսաստանի ազդեցությանը հակազդելու շրջանակներում։ Այս բովանդակությունն առկա է ԱՄՆ-ի ռազմական կարիքների համար հատկացվող միջոցների մասին նախագահ Թրամփի ստորագրած օրենքում։
Փաստաթղթի տեքստում ասում է, որ Պենտագոնի ղեկավարը, պետքարտուղարը և Եվրոպայում ՆԱՏՕ-ի զինված ուժերի գլխավոր հրամանատարը պետք է ռազմավարություն մշակեն «Եվրոպայում ռուսական ագրեսիայի սպառնալիքի տակ գտնվող դաշնակիցներին աջակցելու մասին»։ Նրանք պետք է դիտարկեն նաև Սև ծովում ՆԱՏՕ-ի և Ուկրաինայի և Վրաստանի մասնակցությամբ այլ բազմազգ զորավարժությունների հաճախականությունը և մասշտաբներն ավելացնելու հնարավորությունը։
ԱՄՆ-ի նոր ռազմական բյուջեով նախատեսվում է Պենտագոնին հատկացնել 716 միլիարդ դոլար։ Այս միջոցներն ուղղվելու են, մասնավորապես, զինծառայողների թվի ավելացմանը։ Այն կավելանա մոտ 16 հազարով։ Բացի այդ, նրանց վճարվող նպաստները կավելանան 2,6%-ով։ Փաստաթղթով նախատեսվում է նաև շարունակել Ուկրաինային ռազմական օգնության հատկացումը, որն ուղղվելու է ռազմական ոլորտում Ռուսաստանին հակազդեցությանը։
Այս փաստաթուղթը կոչվել է սենատոր Ջոն Մաքքեյնի անունով, որը քաղցկեղի բուժման կուրսեր անցնելու պատճառով չէր մասնակցում Սենատի լսումներին։