ԱՄՆ-ի գլխավորած կոալիցան կմնա Իրաքում
Միջազգային հակաահաբեկչական կոալիցիայի կազմում գտնվող ամերիկացի զինծառայողները կմնան Իրաքում այս երկրի իշխանությունների խնդրանքով։ Այս մասին հայտարարել է կոալիցիայի պաշտոնական ներկայացուցիչ, ամերիկացի գնդապետ Շոն Ռայանը։
«Ելնելով Իրաքի իշխանությունների դիմումից՝ միջազգային կոալիցիան կմնա այստեղ», - ասել է կոալիցիայի ներկայացուցիչը։ Նրա խոսքով՝ Իսլամական պետությունը «լուրջ հակառակորդ է, դրա անդամների թիվը բավական մեծ է, և կոալիցիան շարունակելու է պայքարը»։
Ավելի վաղ Ռայանը հայտարարել էր, որ կոալիցիան Իրաքում կմնա այնքան ժամանակ, ինչքան անհրաժեշտ կհամարի։
Հիշեցնենք, որ 2014 թ․ ՆԱՏՕ-ի գագաթնաժողովի ժամանակ ԱՄՆ-ի նախաձեռնությամբ ստեղծվել է Իսլամական պետության դեմ պայքարի միջազգային կոալիցիան։ Ամերիկյան կողմի հավաստմամբ՝ կոալիցիային աջակցում է ավելի քան 60 պետություն, այդ թվում՝ Մեծ Բրիտանիան, Դանիան, Հորդանանը, Ֆրանսիան, Բահրեյնը, Ավստրալիան, Սաուդյան Արաբիան և այլն։
2017 թ․ դեկտեմբերին ԱՄՆ նախագահ Դոնալդ Թրամփը հայտարարեց, որ իր երկիրը Սիրիայում և Իրաքում հաղթանակ է տարել Իսլամական պետության դեմ։