Հրթիռային հարձակում՝ Աֆղանստանի նախագահական պալատի վրա
Աֆղանստանի մայրաքաղաք Քաբուլը ենթարկվել է հրթիռակոծության մուսուլմանական «Իդ Ալ Ահդա» տոնի (Քուրբան բայրամ, կամ զոհաբերության տոն, - խմբ․) առիթով նախագահ Աշրաֆ Ղանի ելույթի ժամանակ։ Այս մասին տեղեկացնում է աֆղանական Tolonews հեռուստաալիքը։
Նշվում է, որ հարձակումը տեղի է ունեցել տեղի ժամանակով 09:00-ի (Երևանի ժամանակով՝ 08:30, - խմբ․) սահմաններում։ Աղբյուրի փոխանցմամբ՝ հարձակման թիրախը նախագահական պալատն էր և կառավարական թաղամասը, որտեղ կան մի շարք երկրների դեսպանատներ։
«Դեռ գոյություն ունեն խմբեր, որոնք շարունակում են բռնությունները։ Հրթիռներով նրանք չեն կարող կանգնեցնել Աֆղանստանի զարգացումը», - ասել է նախագահ Աշրաֆ Ղանին։
Զոհերի և վիրավորների մասին տեղեկություններ չեն հաղորդվում։ Երկրում գործող ոչ մի ահաբեկչական խմբավորում դեռ չի ստանձնել տեղի ունեցածի պատասխանատվությունը։