Հայաստանը ԵԱՏՄ-ի և ԵՄ-ի հետ արդյունավետ համագործակցության լավ օրինակ է․ ՄԵրկել

Հայաստանը կարող է օրինակ լինել, թե ինչպես կարելի է համագործակցել Ռուսաստանի հետ և միաժամանակ լավ համագործակցություն ունենալ Եվրոպական Միության հետ:

Ինչպես հայտնում է «Արմենպրես»-ը, ՀՀ վարչապետ Նիկոլ Փաշինյանի հետ համատեղ ասուլիսի ընթացքում այս մասին ասել է Գերմանիայի կանցլեր Անգելա Մերկելը՝ անդրադառնալով հարցին՝ հնարավո՞ր է ապագայում ավելի գործնական քայլեր ձեռնարկվեն ԵԱՏՄ-ի և ԵՄ-ի միջև համագործակցություն ծավալելու շուրջ ու այդ հարցում ի՞նչ դերակատարում կարող է ունենալ Հայաստանը:

«Հայաստանը կարող է լինել օրինակ, թե ինչպես կարելի է լավ համագործակցել Ռուսաստանի հետ և միաժամանակ լավ համագործակցություն ունենալ Եվրամիության հետ: Իհարկե, հնարավորությունները շատ չեն, Եվրասիական տնտեսական միությունը գործնականում ազատ առևտրի գոտի է: Իհարկե, կան շատ լավ տնտեսական հնարավորություններ, որոնցից կարելի է օգտվել:  Ամենամոտ ապագայում ֆորմալ առումով Եվրասիական տնտեսական միության և Եվրամիության միջև բանակցություններ դժվար տեղի ունենան, բայց կարծում եմ, որ Հայաստանի լավ օրինակը կարող է ցույց տալ, որ երբևէ կարելի է նման քայլի գնալ»,- ասել է Գերմանիայիչ կանցլերը։

Հայաստանի Հանրապետության վարչապետ Նիկոլ Փաշինյանն, իր հերթին, ընդգծել է, որ ԵԱՏՄ տարածքն առանձնահատուկ տնտեսական նշանակություն ունի Հայաստանի համար:

«Մենք քննարկման ընթացքում արձանագրեցինք, որ Հայաստանը ունի նաև Եվրոպական Միության  հետ առևտրի հատուկ ռեժիմ՝ GSP+ ռեժիմը, որը հնարավորություններ է տալիս ընդլայնել առևտրաշրջանառության ծավալը Միության հետ: Մենք խնդիր ունենք ոչ միայն ծավալի,  այլ որակական իմաստով փոփոխություն մտցնել մեր առևտրատնտեսական հարաբերություններում, և մեր համատեղ օրակարգի կարևոր մաս է այս ուղղությամբ որոշակի առաջընթաց ապահովելը»,- եզրափակել է վարչապետ Փաշինյանը: