Թուրքիայի և Ռուսաստանի համագործակցությունը շատ կարևոր է Իդլիբում հումանիտար աղետից խուսափելու համար․ Էրդողան
Իդլիբում կառավարական ուժերի գործողությունները կարող են հանգեցնել նոր հումանիտար ճգնաժամի և փախստականների նոր հոսքի դեպքի հարևան Թուրքիա։ Այս մասին, ինչպես գրում է Sabah թերթը, հայտարարել է Թուրքիայի նախագահ Ռեջեփ Թայիփ Էրդողանը։
«Այնտեղ՝ Իդլիբում, ապրում է շուրջ 3,5 միլիոն մարդ։ Ռուսաստանը և Միացյալ Նահանգները պատասխանատվությունը միմյանց վրա են գցում։ Եթե հրթիռները սկսեն ընկնել այս տարածքի վրա, ապա տեղի կունենա արյունահեղություն, և փախստականների նոր հոսք կսկսի դեպի Թուրքիա», - ասել է Էրդողանը։
Նրա խոսքով՝ Ռուսաստանի, Թուրքիայի և Իրանի համագործակցությունը թույլ կտա խուսափել Իդլիբում հումանիտար աղետից։ «Այժմ Թուրքիայի և Ռուսաստանի համագործակցությունը չափազանց կարևոր է», - հավելել է Թուրքիայի նախագահը։
Խոսելով սեպտեմբերի 7-ին Թեհրանում Սիրիայի հարցով կայանալիք եռակողմ հանդիպման մասին՝ Էրդողանը հույս է հայտնել, որ «գագաթնաժողովը կօգնի կասեցնել Ասադի ռեժիմի ագրեսիան»։