Թուրքիայի նպատակն է կանգնեցնել Սիրիայի կառավարական ուժերի գրոհներն Իդլիբի վրա․ Չավուշօղլու

Թուրքիան իր առջև նպատակ է դրել կանգնեցնել Իդլիբի վրա Սիրիայի կառավարական ուժերի հարձակումները։ Այս մասին հայտարարել է Թուրքիայի արտաքին գործերի նախարար Մևլութ Չավուշօղլուն։

«Մենք մեծ ջանքեր ենք գործադրել չափավոր ընդդիմադիր խմբավորումները ծայրահեղականներից տարբերակելու համար։ Ասադի ռեժիմը հարվածներ է հասցնում Իդլիբին՝ որպես պատրվակ օգտագործելով իբր ահաբեկիչների առկայությունն այնտեղ։ Մեր նպատակն է կանգնեցնել Իդլիբի վրա հարձակումները», - Haber Turk-ի եթերում հայտարարել է Չավուշօղլուն։

Չավուշօղլուի խոսքով՝ Թուրքիան շարունակում է «սերտորեն համագործակցել Ռուսաստանի և Իրանի հետ հումանիտար աղետը կանխելու համար»։

Նա նշել է նաև, որ որոշ պետություններ գործում են՝ առաջնորդվելով սեփական շահով։

Հիշեցնենք, որ սեպտեմբերի 7-ին Թեհրանում կայացել է սիրիական հակամարտության կարգավորման հարցով ՌԴ-Թուրքիա-Իրան եռակողմ հանդիպում։ Կողմերը պայմանավորվել են շարունակել ջանքեր գործադրել քաղաքացիական բնակչության պաշտպանության և Սիրիայում հումանիտար վիճակի բարելավմանն ուղղությամբ։ Գագաթնաժողովի մասնակիցները պայմանավորվել են նաև եռակողմ բարձր մակարդակով հաջորդ հանդիպումն անցկացնել Մոսկվայում։