ԱՄՆ-ը չի բացառում հարվածները Սիրիայում ռուսական և իրանական ուժերին․ WSJ
Վաշինգտոնը կարծում է, որ Սիրիայի նախագահ Բաշար Ասադը թույլ է տվել իր զորքին քիմիական զենք կիրառել Իդլիբի ազատագրման համար․ սրա հետ կապված ԱՄՆ-ը չի բացառում Սիրիայի, Ռուսաստանի և Իրանի ուժերին հարվածներ հասցնելու հավանականությունը։ Այս մասին ասվում է ամերիկյան The Wall Street Journal թերթում տեղ գտած հոդվածում։
Աղբյուրի փոխանցմամբ՝ Ասադը թույլատրել է քլոր և այլ քիմիական նյութեր օգտագործել ահաբեկիչների վերջին հենակետերի վրա գրոհներ իրականացնելիս։ Ինչպես նշվում է հոդվածում, ամերիկյան հատուկ ծառայություններն օպերատիվ տեղեկություններ են ստացել այն մասին, որ Ասադը թույլ է տվել քիմիական զենք օգտագործել ոչ միայն ահաբեկիչների հենակետերի գրոհների, այլ նաև ցանկացած ռազմական գործողության ժամանակ։ Նշվում է նաև, որ դեռ հայտնի չէ, թե թույլատրվել է արդյոք կիրառել զարին տեսակի գազ։
Ինչպես նշում է հեղինակը, Պենտագոնը հնարավոր հակահարվածներ է նախապատրաստում, սակայն նախագահ Թրամփը դեռ հստակ չի որոշել՝ թիրախավորել արդյոք ռուսական և իրանական ուժերին, թե՝ ոչ։ Նշվում է նաև, որ, եթե Միացյալ Նահանգները որոշի հարվածներ հասցնել Սիրիային, ապա դրանք կլինեն ամենաուժեղը երբևէ հասցվածների մեջ։
«Ես ԱՄՆ-ի ծրագրերի մասին մեկնաբանություններ չեմ անի, սակայն Ասադի կողմից քիմիական զենքի կիրառումը և քաղաքացիական անձանց կյանքերի նկատմամբ անհաղորդ լինելն արդեն ակնհայտ է բոլորի համար», - ասել է Պենտագոնի մամուլի ծառայության ղեկավար Դանա Ուայթը։
Նշվում է նաև, որ Միացյալ Նահանգները չի բացառում սիրիացի պաշտոնատար անձնաց նկատմամբ տնտեսական պատժամիջոցների սահմանումը։
Հոդվածի հեղինակը գրում է, որ վերջին շաբաթներում Վաշինգտոնը փորձել է կանխել Իդլիբում ռազմական գործողությունները, իսկ ԱՄՆ նախագահի՝ ազգային անվտանգության հարցերով խորհրդական Ջոն Բոլթոնը և ԱՄՆ պետքարտուղար Մայք Պոմպեոն փորձել են Մոսկվայից երաշխիքներ ստանալ, որ այնտեղ քիմիականզ զենք չի կիրառվի։
Սիրիայի հյուսիսում գտնվող Իդլիբ նահանգը միակ շրջանն է, որը դեռ գտնվում է զինված խմբավորումների վերահսկողության տակ։ Ավելի վաղ այնտեղ ստեղծվել էր անվտանգության գոտի։