Էրդողանը Դամասկոսին մեղադրում է Իդլիբի վրա լայնածավալ հարձակում նախապատրաստելու մեջ

Սիրիայի իշխանությունները նախագահ Բաշար Ասադի գլխավորությամբ լայնածավալ հարձակում են նախապատրաստում Իդլիբի վրա, ինչը հղի է արյունահեղության վտանգով, և դրա կանխման պատասխանատվությունը հավասարապես ընկած է Արևմուտքի, ինչպես նաև Ռուսաստանի և Իրանի վրա։ Այս մասին հայտարարել է Թուրքիայի նախագահ Ռեջեփ Թայիփ Էրդողանը։

Նա Ասադին մեղադրել է իր կողմնակիցների հետ միասին Իդլիբի վրա լայնածավալ հարձակում նախապատրաստելու մեջ, որտեղ ապրում է շուրջ 3 միլիոն մարդ։

«Ասադի ռեժիմը ձգտում է իր անխուսափելի հարձակումն արդարացնել ահաբեկչությանը հակազդելու անհրաժեշտությամբ։ Անմեղ մարդկանց պետք չէ զոհաբերել ահաբեկչության դեմ պայքարի քողի տակ։ Այն միայն դրական կազդի ահաբեկչության և ծայրահեղականության տարածման վրա։ Իսլամական պետության վերելքը դարձավ հետևանք, ոչ թե պատճառ Սիրիայում տեղի ունեցած իրադարձությունների։ Միջազգային հանրությունը պետք է կանխի այդ բռնությունը, որպեսզի թույլ չտա ահաբեկչությանն արմատներ գցել», - ասել է Էրդողանը։

Նրա խոսքով՝ հաջորդ արյունահեղությունը կանխելու պատասխանատվությունը դրված է Արևմուտքի վրա։ Էրդողանը կարծում է, որ Աստանյան ձևաչափում իր գործընկերները՝ Իրանը և Ռուսաստանը նույնպես պատասխանատու են Իդլիբում հումանիտար աղետի կանխման հարցում։

Հիշեցնենք, որ սեպտեմբերի 7-ին Թեհրանում կայացել է սիրիական հակամարտության կարգավորման հարցով ՌԴ-Թուրքիա-Իրան եռակողմ հանդիպում։ Կողմերը պայմանավորվել են շարունակել ջանքեր գործադրել քաղաքացիական բնակչության պաշտպանության և Սիրիայում հումանիտար վիճակի բարելավմանն ուղղությամբ։ Գագաթնաժողովի մասնակիցները պայմանավորվել են նաև եռակողմ բարձր մակարդակով հաջորդ հանդիպումն անցկացնել Մոսկվայում։

Սիրիայի հյուսիսում գտնվող Իդլիբ նահանգը միակ շրջանն է, որը դեռ գտնվում է զինված խմբավորումների վերահսկողության տակ։ Ավելի վաղ այնտեղ ստեղծվել էր անվտանգության գոտի։ Սիրիայի հակամարտության հարցով ՄԱԿ-ի գլխավոր քարտուղարի հատուկ բանագնաց Ստեֆան Դե Միստուրայի տվյալներով՝ Իդլիբում կա «Ջեբհաթ ալ Նուսրա» և «Ալ Քաիդա» ահաբեկչական խմբավորումների շուրջ 10 հազար զինյալ։