Սթոլթենբերգը մեկնաբանել է Թուրքիայի կողմից ռուսական Ս-400 համակարգի ձեռքբերումը

ՆԱՏՕ-ի գլխավոր քարտուղար Յենս Սթոլթենբերգը մեկնաբանել է Թուրքիայի կողմից ռուսական Ս-400 զենիթահրթիռային համակարգի ձեռքբերումը։

Սթոլթենբերգի խոսքով՝ ինքն այս հարցը բազմիցս քննարկել է Անկարայում և Վաշինգտոնում։ ՆԱՏՕ-ի գլխավոր քարտուղարը նշել է, որ Հյուսիսատլանտյան դաշինքի համար չափազանց կարևոր է համատեղելիությունը։

Նա հույս է հայտնել, որ այս հարցն անպայման կլուծվի։

«Մենք տեսնում ենք, որ սա ահազանգ է բոլորիս համար», - հայտարարել է Սթոլթենբերգը՝ դժգոհելով Ս-400-ի ձեռքբերման շուրջ տարաձայնությունների առկայությունից։

Հիշեցնենք, որ նախորդ տարվա դեկտեմբերին Թուրքիան և Ռուսաստանը համաձայնագիր են կնքել Ս-400-ի ձեռքբերման վերաբերյալ։ Ըստ համաձայնագրի՝ Անկարան պետք է գնի զենիթահրթիռային այս համակարգի երկու մարտկոց։

Միացյալ Նահանգները և ՆԱՏՕ-ն բազմիցս քննադատել են Թուրքիային այս համաձայնագրի համար։ ԱՄՆ պետքարտուղարի օգնական Ուես Միթչելի խոսքով՝ Ս-400-ի ձեռքբերումը կարող է բացասականորեն ազդել ամերիկյան Ֆ-35 կործանիչների՝ Թուրքիա մատակարարման վրա։

Ի պատասխան՝ Անկարան հայտարարեց, որ միջոցներ կձեռնարկի, եթե Միացյալ Նահանգները փորձի կենսագործել հնչեցրած սպառնալիքները։