Առանց Ղարաբաղյան հակամարտության կարգավորման հնարավոր չէ բացել հայ-թուրքական սահմանը․ Էրդողան
Թուրքիայի նախագահ Ռեջեփ Թայիփ Էրդողանը հայտարարել է, որ առանց Ղարաբաղյան հակամարտության կարգավորման հնարավոր չէ բացել Հայաստանի հետ սահմանը և դիվանագիտական հարաբերություններ հաստատել Երևանի հետ։
«Առանց հակամարտության կարգավորման, առանց փախստականներին իրենց տները վերադարձնելու չի կարող խոսք գնալ սահմանի բացման կամ հարաբերությունների հաստատման մասին», - Բաքվում ունեցած ելույթի ժամանակ հայտարարել է Էրդողանը։
Հիշեցնենք, որ հայ-թուրքական հարաբերությունների կարգավորման գործընթացն սկսվել էր 2008 թ․ աշնանը՝ Սերժ Սարգսյանի նախաձեռնությամբ։ 2009 թ․ հոկտեմբերին Ցյուրիխում Հայաստանի և Թուրքիայի արտգործնախարարներն ստորագրեցին երկու փաստաթուղթ Հայաստանի և Թուրքիայի միջև դիվանագիտական հարաբերություններ հաստատելու և այդ հարաբերությունները զարգացնելու մասին։ Նույն տարվա դեկտեմբերին Թուրքիայի այդ ժամանակվա վարչապետ Ռեջեփ Թայիփ Էրդողանը հայտարարեց, որ Անկարան արձանագրությունները չի վավերացնի առանց ղարաբաղյան հակամարտության կարգավորման։
2010 թվականի ապրիլի 22-ին Սերժ Սարգսյանը հայտարարեց հայ-թուրքական արձանագրությունների վավերացման գործընթացը առկախելու մասին՝ փաստելով, որ Թուրքիան պատրաստ չէ շարունակել սկսված գործընթացը։
Արդեն 2018 թ․ մարտի մեկին ՀՀ նախագահ Սերժ Սարգսյանը չեղարկեց արձանագրությունները։