Ամերիկյան անօդաչու սարքը թռիչք է իրականացրել Սև ծովի ռուսական ափերի մոտ

ԱՄՆ ռազմաօդային ուժերի RQ-4 Global Hawk ռազմավարական հետախուզական անօդաչու սարքը թռիչք է իրականացրել Սև ծովի ռուսական ափերի մոտ։ Այս մասին գրում է Ռիա Նովոստի-ն՝ հղում կատարելով PlaneRadar-ի թվիթերյան հայտարարությանը։

Նշվում է, որ անօդաչու սարքը իր թռիչքն սկսել է ՆԱՏՕ-ի՝ Իտալիայում գտնվող Սիգոնելլա ռազմաբազայից Մոսկվայի ժամանակով 12:19-ին։ Այն հետախուզական թռիչք է իրականցրել Դոնբասի մոտակայքում։ Այստեղ մոնիտորինգ անցկացնելուց հետո այն շարժվել է դեպի Ղրիմ և Կրասնոդարի շրջան։

Անօդաչու սարքը նշված տարածքում շրջել է մոտ 8 ժամ՝ երբեմն մինչև 40 կիլոմետր մոտենալով ռուսական ափերին։

22:19-ին դրոնը շարժվել է դեպի տեղակայման վայր։

Կեսօրին մոտ Ռուսաստանի սևծովյան ափերի մոտ նկատվել է նաև ամերիկյան Boeing P-8A Poseidon պարեկային ինքնաթիռը։

Ռիա Նովոստի-ն հիշեցնում է, որ վերջին ամիսների ընթացքում բավականին հաճախակիացել են ամերիկյան անօդաչու սարքերի թռիչքները ռուսական սահմանների մոտ։