Արդեն սկսվել է ռուսական Ս-300 համակարգերի մատակարարումը Սիրիային․ Լավրով
Ռուսաստանն արդեն սկսել է Ս-300 զենիթահրթիռային համակարգերի մատակարարումը Սիրիային։ Այս մասին ՄԱԿ-ի Գլխավոր Ասամբլեայի հերթական նստաշրջանն ամփոփող մամուլի ասուլիսի ժամանակ հայտարարել է ՌԴ արտաքին գործերի նախարար Սերգեյ Լավրովը։
«Ռուսական Ս-300 զենիթահրթիռային համակարգերն արդեն սկսել են ուղարկվել Սիրիա։ Ինչպես նշել է նախագահ Վլադիմիր Պուտինը, մատակարարումն սկսվել է ԻԼ-20 ինքնաթիռի հետ տեղի ունեցած դեպքից հետո», - ասել է Լավրովը։
ՌԴ արտաքին քաղաքական գերատեսչության ղեկավարի խոսքով՝ Ռուսաստանի պաշտպանության նախարարությունն արտասահմանի գործընկերներին և միջազգային հանրությանն արդեն ներկայացրել է միջադեպի ողջ մանրամասները և սպառիչ մեկնաբանություն տվել տեղի ունեցած ողբերգության կապակցությամբ։
«Ինչպես նշում է նախագահ Պուտինը, մեր ձեռնարկած միջոցները պետք է երաշխավորեն Սիրիայում ծառայող մեր զինվորականների 100%-անոց անվտանգությունը, և մենք կձեռնարկենք այդ միջոցերը», - շարունակել է Լավրովը։
Ավելի վաղ՝ սեպտեմբերի 24-ին, ՌԴ պաշտպանության նախարար Սերգեյ Շոյգուն հայտարարել էր, որ Ս-300 համակարգերի՝ Սիրիա մատակարարումը կիրականացվի երկու շաբաթվա ընթացքում։
Աղբյուր՝ https://tass.ru/politika/5618228