ԱՄՆ-ն ամբողջությամբ դադարեցրել է նավթի մատակարարումը Չինաստան

ԱՄՆ-ն ամբողջովին դադարեցրել է նավթի մատակարարումը Չինաստանին։ Այս մասին հայտարարել է China Merchants Energy Shipping ընկերության տնօրեն Սե Չունլինը։

«Մենք ԱՄՆ-ից Չինաստան մատակարարվող նավթի հիմնական փոխադրողն ենք։ Մինչև մեր երկրների միջև առևտրային պատերազմի սկսելը դա շատ լավ բիզնես էր, սակայն այն ամբողջովին կանգնեցվել է», - Հոնկոնգում կայացած գագաթնաժողովի ժամանակ հայտարարել է Չունլինը։

Միացյալ Նահանգները Չինաստանին սկսել է նավթ մատակարարել ընդամենը երկու տարի առաջ։ ԱՄՆ-ի էներգետիկ ենթակառուցվածքների վարչության տեղեկությունների համաձայն՝ ամերիկյան սև ոսկու Չինաստան մատակարարման ծավալները 2017 թ․ գերազանցել են Մեծ Բրիտանիա և Նիդելանդներ մատակարարվող նավթի ծավալները։ Չինաստանն այսպիսով դարձել էր ամերիկյան նավթի ներկրման ծավալներով երկրորդ ամենամեծ երկիրը Կանադայից հետո։ Չինաստանին բաժին էր հասնում ամերիկյան նավթի 20%-ը։  

Հիշեցնենք, որ Չինաստանի և ԱՄՆ-ի միջև փոխադարձ ավելացված մաքսատուրքերն ուժի մեջ են մտել  հուլիսի 6-ից։

Այս տարվա ապրիլի սկզբին ԱՄՆ-ը հրապարակել է չինական 1300 անուն ապրանքներից բաղկացած ցուցակ, որոնց ներկրման վրա կարող են սահմանվել լրացուցիչ մաքսատուրքեր։

Ի պատասխան՝ Պեկինը որոշեց 25%-ով բարձրացնել ամերիկյան 106 անուն ապրանքների ներկրման մաքսատուրքերը։

Արդեն մայիսին կողմերը համաձայնեցին, որ առևտրային պատերազմ չի լինելու, սակայն ավելի ուշ պարզ դարձավ, որ առևտրային հարցերում համաձայնության հասնել չի հաջողվել, և Վաշինգտոնը հայտարարեց լրացուցիչ մաքսատուրքերի սահմանման մասին։

Հունիսի կեսին Միացյալ Նահանգները 25%-անոց մաքսատուրքեր սահմանեց չինական ապրանքների ներկրման վրա, ինչն ազդեց ԱՄՆ ներկրվող չինական ապրանքների 10%-ի վրա։

Չինաստանն անմիջապես հայտարարեց, որ 25% մաքսատուրք է սահմանվում ամերիկյան 659 անուն ապրանքների ներկրման վրա։

Աղբյուր՝  https://ria.ru/economy/20181003/1529929836.html?referrer_block=index_main_3