Ավստրալիան կարող է Իսրայելում իր դեսպանատունը տեղափոխել Երուսաղեմ

Ավստրալական կառավարության ղեկավար Սքոթ Մորիսոնը հայտարարել է, որ Իսրայելում Ավստրալիայի դեսպանատունը Թել Ավիվից Երուսաղեմ տեղափոխելու հարցը կլուծվի մինչև ընթացիկ տարվա դեկտեմբեր։ Այս մասին, ինչպես գրում է ՏԱՍՍ-ը, ասվում է Ավստրալիայի կառավարության պաշտոնական կայքում։

«Այսօր Ավստրալիայի կառավարությունն արել է մի շարք կարևոր հայտարարություններ Մերձավոր Արևելքում Ավստրալիայի շահերի պաշտպանության վերաբերյալ։ Ընդհանուր առմամբ՝ այդ հայտարարությունները վերահաստատում են հավատարմությունը իսրայելապաղեստինյան հակամարտության կարգավորման անհրաժեշտությանը, նպաստում Իսրայելի հետ մեր հարաբերությունների ամրապնդմանը և ցույց տալիս Իրանի հետ կառուցողական համագործակցությունը շարունակելու մեր մտադրությունը», - ասվում է կառավարության ղեկավարի և արտաքին գործերի նախարար Մարիս Փեյնի համատեղ հայտարարության մեջ։

Մորիսոնը և Փեյնը, մասնավորապես, նշել են, որ մոտ ապագայում երկրի կառավարությունը կվերանայի Երուսաղեմն Իսրայելի մայրաքաղաք ճանաչելու հարցը՝ միևնույն ժամանակ Արևելյան Երուսաղեմն ընդունելով որպես Պաղեստինի ապագա պետության մայրաքաղաք։

Հայտարարության մեջ նշված է նաև, որ Ավստրալիայի կառավարությունը կքննարկի երկրի դեսպանատունը Արևմտյան Երուսաղեմ տեղափոխելու առավելությունները, սակայն «յուրաքանչյուր որոշման հիմքում պետք է ընկած լինի ազգային շահի համար կատարվող քայլի հետևանքների մանրակրկիտ գնահատականը»։

Ակնկալվում է, որ հայտարարության մեջ տեղ գտած բոլոր որոշումները կկայացվեն մինչև այս տարվա դեկտեմբեր։