Ամերիկյան ռազմանավերն անցել են Չինաստանի սահմանների մոտով
Թայվանի պաշտպանության նախարարությունը տեղեկացրել է, որ ԱՄՆ ռազմածովային ուժերի երկու նավ անցել է Թայվանյան նեղուցով։ Այս մասին գրում է Lenta-ն՝ հղում կատարելով Reuters գործակալությանը։
Ամերիկյան նավերն անցել են մայրցամաքի և Թայվանի նեղուցի միջով, որպեսզի համոզվեն, որ ծովային այս ճանապարհն անվտանգ է և ազատ։
«Թայվանյան նեղուցով ամերիկյան նավերի անցնելը ցույց է տալիս ԱՄՆ-ի մոտեցումը հնդկական և խաղաղօվկիանոսյան տարածաշրջանում տիրող իրավիճակին։ Ամերիկյան նավերը և ինքնաթիռները շարունակում են գործել ամեն տեղ, որտեղ թույլ է տալիս միջազգային իրավունքը», - ասել է ԱՄՆ ռազմածովային ուժերի խաղաղօվիանոսյան նավատորմի խոսնակ Նեյթ Քրիստենսենը։
Նախորդ անգամ ամերիկյան նավերն այս տարածքում նկատվել էին 2018 թ․ հուլիսին։ Ինչպես գրում է Reuters-ը, սա կարող է բարկացնել Չինաստանին՝ հաշվի առնելով Պեկինի և Վաշինգտոնի միջև լարված հարաբերությունները։
Հիշեցնենք, որ Չինաստանի և ԱՄՆ-ի միջև փոխադարձ ավելացված մաքսատուրքերն ուժի մեջ են մտել հուլիսի 6-ից։
Այս տարվա ապրիլի սկզբին ԱՄՆ-ը հրապարակել է չինական 1300 անուն ապրանքներից բաղկացած ցուցակ, որոնց ներկրման վրա կարող են սահմանվել լրացուցիչ մաքսատուրքեր։
Ի պատասխան՝ Պեկինը որոշեց 25%-ով բարձրացնել ամերիկյան 106 անուն ապրանքների ներկրման մաքսատուրքերը։
Արդեն մայիսին կողմերը համաձայնեցին, որ առևտրային պատերազմ չի լինելու, սակայն ավելի ուշ պարզ դարձավ, որ առևտրային հարցերում համաձայնության հասնել չի հաջողվել, և Վաշինգտոնը հայտարարեց լրացուցիչ մաքսատուրքերի սահմանման մասին։
Հունիսի կեսին Միացյալ Նահանգները 25%-անոց մաքսատուրքեր սահմանեց չինական ապրանքների ներկրման վրա, ինչն ազդեց ԱՄՆ ներկրվող չինական ապրանքների 10%-ի վրա։
Չինաստանն անմիջապես հայտարարեց, որ 25% մաքսատուրք է սահմանվում ամերիկյան 659 անուն ապրանքների ներկրման վրա։