Ռուսաստանը և Հնդկաստանը պայմանագիր են կնքել ռազմանավերի մատակարարման մասին
Ռուսաստանը և Հնդկաստանը պայմանագիր են կնքել հնդկական ռազմածովային ուժերին երկու հածանավ տրամադրելու մասին։ Այս մասին գրում է TASS-ը՝ հղում կատարելով The Economic Times-ին։
Աղբյուրի փոխանցմամբ՝ խոսքը երկու նոր նավերի մասին է, որոնք կառուցվելու են Ռուսաստանում։ Հնդկական կողմի պատվերով՝ նավերը համատեղելի են լինելու ռուս-հնդկական «БраМос» գերձայնային թևավոր հրթիռների հետ։ Պայմանագիրը, որը կնքվել է նախորդ շաբաթ, կազմում է մոտ 950 միլիոն դոլար։
Թերթը նշում է, որ, հաշվի առնելով ԱՄՆ-ի հակառուսական պատժամիջոցները, պայմանագրի վճարումը կկատարվի ռուփի-ռուբլի սխեմայով։
Ակնկալվում է, որ ավելի ուշ կկնքվի ևս մեկ պայմանագիր հնդկական նավատորմի համար երկու նմանատիպ հածանավ կառուցելու և մատակարարելու մասին։
Ավելի վաղ հնդկական լրատվամիջոցները հայտնում էին, որ Հնդկաստանի կառավարությունը պարաստվում է Ռուսաստանի հետ պայմանագիր կնքել չորս հածանավ ձեռք բերելու մասին, որը պետք է իրականացվեր 2+2 ձևաչափով։
Կառուցվելիք նավերը նախատեսված են լինելու ինչպես սովորական նավերին, այնպես էլ սուզանավերին հարված հասցնելու համար։ Դրանք կարողանալու են թիրախներ խոցել օվկիանոսային հեռավորության վրա։