Իրավապահներին դեռ չի հաջողվել գտնել սաուդցի լրագրողի դին․ Չավուշօղլու
Թուրքիայի իրավապահ մարմիններին չի հաջողվել հայտնաբերել լրագրող Ջեմալ Խաշոգջիի մարմինը։ Այս մասին Ստամբուլում տեղի ունեցած մամուլի ասուլիսի ժամանակ հայտարարել է Թուրքիայի արտաքին գործերի նախարար Մևլութ Չավուշօղլուն։
«Այս պահին դեռ չի հայտնաբերվել լրագրող Խաշոգջիի դին։ Ավելի վաղ Սաուդյան Արաբիայում ձերբակալվել են անձինք, որոնք ծրագրել են այս սպանությունը։ Մենք պետք է շարունակենք համագործակցությունը, և այս կապակցությամբ շատ կարևոր է մեր երկրների գլխավոր դատախազների համատեղ աշխատանքը։ Հետաքննությունը պետք է շուտով ավարտվի», - ասել է Չավուշօղլուն։
Ավելի վաղ բանակցություններ էին տեղի ունեցել Ստամբուլի դատախազ Իրֆան Ֆիդանի և Սաուդյան Արաբիայի գլխավոր դատախազ Սաուդ Ալ Մուաջիբի միջև, որը տևել էր ավելի քան մեկ ժամ։
Հիշեցնենք, որ լրագրող Ջեմալ Խաշոջին աշխատում էր ամերիկյան The Washington Post թերթում և 2017 թվականից ապրում էր ԱՄՆ-ում։ Նա անհետացել է հոկտեմբերի 2-ին, երբ մտել է Ստամբուլում Սաուդյան Արաբիայի գլխավոր հյուպատոսարանի շենք։
Շուրջ երկու շաբաթ Թուրքիայում սաուդական դիվանագիտական ներկայացուցչությունը պնդում էր, որ լրագրողը հեռացել է շենքից։ Հոկտեմբերի 20-ին Սաուդյան Արաբիայի լրատվականները հրապարակել էին երկրի գլխավոր դատախազի հայտարարությունը, ըստ որի՝ Խաշոջին մահացել է Ստամբուլի գլխավոր հյուպատոսարանում վերջինիս և դիվանագիտական ներկայացուցչության մի քանի աշխատակիցների միջև ծագած վեճի արդյունքում։ Դատախազի խոսքով՝ այդ գործով ձերբակալվել է 18 մարդ, որոնք հարցաքննվել են։
Սաուդյան Արաբիայի արտաքին գործերի նախարար Ադել ալ-Ջուբեյրը, մեկնաբանելով լրագրողի սպանությունը, նշել է, որ հանցագործները չարաշահել են իրենց լիազորությունները։
Սաուդյան Արաբիայի թագավոր Սալման Բին Աբդուլ Ազիզ Ալ-Սաուդը և թագաժառանգ Մուհամմեդ Բին Սալման Ալ-Սաուդը հեռախոսով ցավակցել են սպանված լրագրողի ընտանիքին։