Թրամփը ցանկանում է Չինաստանի հետ նոր առևտրային համաձայնագիր կնքել․ Bloomberg
ԱՄՆ նախագահ Դոնալդ Թրամփը պաշտոնատար անձանց հրահանգել է կազմել Չինաստանի հետ առևտրային նոր համաձայնագիր, որն ինքը նախագահ Սի Ցզինպինին կներկայացնի այս տարվա նոյեմբերի 30-ին և դեկտեմբերի 1-ին Բուենոս Այրեսում կայանալիք G20-ի գագաթնաժողովի ժամանակ։ Այս մասին տեղեկացնում է Bloomberg գործակալությունը։
Ավելի վաղ Թրամփն իր թվիթերյան էջում գրել էր, որ հեռախոսազրույց է ունեցել Չինաստանի նախագահի հետ, որի ժամանակ քննարկվել էր առևտրին վերաբերող հարցեր։ Չինական լրատվամիջոցներն, իրենց հերթին, տեղեկացնում էին, որ Թրամփը կողմ է Պեկինի հետ առևտրատնտեսական խնդիրները լուծելու համար երկխոսություն սկսելուն։
Հիշեցնենք, որ Չինաստանի և ԱՄՆ-ի միջև փոխադարձ ավելացված մաքսատուրքերն ուժի մեջ են մտել հուլիսի 6-ից։
Այս տարվա ապրիլի սկզբին ԱՄՆ-ը հրապարակել է չինական 1300 անուն ապրանքներից բաղկացած ցուցակ, որոնց ներկրման վրա կարող են սահմանվել լրացուցիչ մաքսատուրքեր։
Ի պատասխան՝ Պեկինը որոշեց 25%-ով բարձրացնել ամերիկյան 106 անուն ապրանքների ներկրման մաքսատուրքերը։
Արդեն մայիսին կողմերը համաձայնեցին, որ առևտրային պատերազմ չի լինելու, սակայն ավելի ուշ պարզ դարձավ, որ առևտրային հարցերում համաձայնության հասնել չի հաջողվել, և Վաշինգտոնը հայտարարեց լրացուցիչ մաքսատուրքերի սահմանման մասին։
Հունիսի կեսին Միացյալ Նահանգները 25%-անոց մաքսատուրքեր սահմանեց չինական ապրանքների ներկրման վրա, ինչն ազդեց ԱՄՆ ներկրվող չինական ապրանքների 10%-ի վրա։
Չինաստանն անմիջապես հայտարարեց, որ 25% մաքսատուրք է սահմանվում ամերիկյան 659 անուն ապրանքների ներկրման վրա։