Իսրայելը ողջունում է Իրանի նկատմամբ ԱՄՆ-ի պատժամիջոցները

Իսրայելի արտաքին գործերի նախարարությունը ողջունում է ԱՄՆ-ի կողմից Իրանի նկատմամբ պատժամիջոցների սահմանումը։ Այս մասին ասվում է Իսրայելի արտաքին քաղաքական գերատեսչության թվիթերյան էջում տեղ գտած հայտարարության մեջ։

«Իրանական ռեժիմի նկատմամբ այսօր ուժի մեջ մտնող պատժամիջոցները չափազանց կարևոր են ահաբեկչական գործունեությունից հրաժարվել ստիպելու տեսանկյունից, ինչը շատ վտանգավոր է ինչպես մեր տարածաշրջանի, այնպես էլ ամբողջ աշխարհի համար», - ասվում է հայտարարության մեջ։

Իսրայելի ԱԳՆ-ի թվիթերում տեղ է գտել նաև Բենիամին Նեթանյահուի՝ ավելի վաղ արած հայտարարությունը, ըստ որի՝ ինքը «երկար տարիներ կոչ է արել ամբողջությամբ վերականգնել Իրանի՝ ամբողջ աշխարհին սպառնացող ահաբեկչական ռեժիմի դեմ պատժամիջոցները»։

Նեթանյահուն շնորհակալություն է հայտնել Թրամփին «պատմական քայլի համար»՝ նշելով, որ պատժամիջոցների հետևանքներն զգացվում են նույնիսկ հիմա, քանի որ Իրանի տնտեսությունն սկսել է սրընթաց անկում ապրել։